MCHEZAJI WA ZAMANI SIMBA ASEMA HANA IMANI NA KAMATI YA UCHAGUZI

WAMBURA

Kiungo wa zamani wa Simba, Arthur Mambeta, ameishutumu kamati ya uchaguzi ya klabu hiyo iliyo chini ya mwenyekiti Dk Damas Ndumbaro kuwa, haitendi haki ipasavyo, hasa baada ya kumuengua mgombea wa nafasi ya urais, Michael Wambura.

Kamati hiyo ilimuengua Wambura baada ya kuwekewa pingamizi kwamba amesimamishwa uanachama wa klabu hiyo, pia aliwahi kuipeleka Simba mahakamani mwaka 2010.

Akizungumza jijini Dar es Salaam, Mambeta alisema hana imani tena na kamati hiyo kutokana na maamuzi waliyoyafanya ambayo hayaendani na maelekezo ya katiba.

“Tulikuwa tukiitegemea sana hii kamati kwenye masuala haya lakini sasa wameondoa imani yao kwetu kwa haya maamuzi ya kumuondoa Wambura.

“Yaani hata mtu ukimwambia amsikilize Ndumbaro kisha umpe katiba aisome, ataona kabisa kwamba wanaenda kinyume na miongozo ya katiba na wanafanya maamuzi wanayoyataka,” alisema Mambeta.

Hata hivyo, tayari Wambura ameshakata rufaa kwenye Shirikisho la Soka Tanzania (TFF) kwa ajili ya kupinga kuenguliwa huko na rufaa hiyo inatarajia kusikilizwa Juni 9, mwaka huu.