MAKALA: RUFAA YA WAMBURA NA NANI ACHAGULIWE KUINGOZA SIMBA

USHINDI wa rufaa ya Michael Richard Wambura umeonekana kuwashangaza kwa kuwa maswali sasa yamehamia katika suala la sheria kama inawezekana watu kupiga kura katika jambo linalohusu vifungu vya kisheria!

Maswali hayo  yanaweza yakawa muhimu kwa kuwa watu wanataka kujifunza, nafasi wanayo kwa kuwa wanasheria ni wengi, lahisi kuuliza na jibu likapatikana kama jambo lilikuwa sahihi au la!

Lakini inawezekana bado jambo hilo halitakuwa ndiyo la muhimu zaidi kuliko yote kwa Wanasimba ambao wiki mbili na ushee tayari watakuwa kwenye viti vyao kufanya uchaguzi wa Rais mpya wa Simba.

Mungu pekee ndiye anayejua nani atakuwa rais wa Simba, Evans Aveva, Wambura au……. Lakini kitu cha mwisho kabisa ni suala la umakini na umuhimu wa uongozi, kwamba atakayechukua na timu yake wataifanyia nini Simba.

Simba haistahili matesho ya miaka mingine minne tena kama ilivyokuwa katika uongozi uliopita wa Ismail Aden Rage ambaye alisema mengi bila ya kutekeleza. Mwisho akaondoka na kuacha makovu mengi, ahadi nyingi ambazo hakuzitekeleza pia!

Kipindi hiki, unaweza mambo sasa safi, Wambura amerudishwa na wanachama hasa wale ambao walikuwa wakitaka hata kanuni zikiukwe, arudishwe ili agombee na wanachama ndiyo wawe waamuzi wa mwisho, sasa wana nafasi ya kumchagua kiongozi wanayemtaka.

Nafasi si kila kitu, kuchagua tu bila ya kutakafakari pia ni ujuha! Lazima kila Mwanasimba awe makini, atafakari kabla ya kuandika kwenye karatasi yake na kitu kizuri, Aveva na Wambura hakuna ambaye atakuwa mgeni kwao.

Kikubwa wawe huru, wasishinikizwe na mtu au kwa kuwa Wambura amerejea baada ya kurudishwa na kamati ya rufaa ya TFF, basi ndiyo aonekane ni shujaa, la hadha! Kikubwa kinachotakiwa wamuangalie na wapate uhakika, kuwa kweli ataisaidia Simba ilipokwama sasa, inaishi katika maisha si ya hadhi yake, hali kadhalika kwa Aveva na….

Kwenye kipindi hiki cha uchaguzi, kila utakachoandika ni lawama, watu wengi sana hawawezi kujibu hoja na msingi wa wanachokiona ni kulaumu. Mimi sibabaiki hata kidogo, ndiyo maana nilisema mabaya ya uongozi uliopita bila ya woga, leo kila kitu kimeonekana.

Simba ikidorora mpira wa Tanzania hauwezi kwenda kwa kasi, hakuna anayeweza kubisha kuwa nguvu ya Simba na watani wake Yanga ni kubwa. Ndiyo maana Azam FC ina kila kitu lakini baso haifikii hata robo ya nguvu ya wakongwe hao.

Hivyo, kuweni wakweli, acheni upambe, achaneni na kulalamika kwa kila jambo, badala yake chagueni bila ya ushabiki, shinikizo wala vijisenti vya nauli. Ihurumieni Simba, onyesheni kweli mnapenda maendeleo ya mpira hapa nyumbani. Kila la kheri.