MAYWEATHER ANAIKAMATA DUNIA, MABONDIA TANZANIA WANAKUFA NA UMASIKINI!

Na Saleh Ally

NINGELIJADILI suala la umasikini wa mabondia wa Tanzania katika kipindi cha wiki tatu zilizopita, mngeweza kusema mimi ni mtu mwenye hila sana, lakini bado nisingekuwa na sababu ya kuhofia.

Lakini sasa naona ni wakati mwafaka kabisa wa kujadili suala la mabondia wa Tanzania kuendelea kuwa masikini, wasio na uhakika hata na mlo wa siku tu licha ya kushikilia mikanda mikubwa au kucheza mapambano makubwa.

Kwa mujibu wa jarida la Forbes la Marekani, mchezo wa ngumi za kulipwa ndiyo unaolipa kuliko mwingine yoyote duniani kuanzia mwaka jana.

Mkali wa kurusha makonde duniani, Floyd Mayweather sasa ndiye bondia anayelipwa fedha nyingi zaidi kuliko mwingine yoyote, akifuatiwa na mwanasoka Cristiano Ronaldo wa Real Madrid na LeBron James anayekipiga katika timu ya kikapu ya Miami Heat ndani ya NBA, anashika nafasi ya tatu.

 

CHEKA DHIDI YA WILLS KUTOKA MAREKANI

Kwa mwaka jana, Mayweather ambaye sasa ameikamata dunia alilipwa kitita cha dola milioni 105, Ronaldo akafuatia dola milioni 80 n LeBron akachukua ddola milioni 72.3.

Nafasi ya nne ni Lionel Messi wa Barcelona aliyechukua dola milioni 64.7, halafu Kobe Bryant wa LA Lakers anafunga 5 Bora kwa kuchukua dola milioni 64.5.

Ukiangalia vizuri kwenye 5 Bora hiyo utaona wanamichezo waliopo ni ngumi (mmoja), soka (wawili) na kikapu (wawili). Pamoja na wingi wa idadi kwa michezo mingine, lakini anayelipwa zaidi ni mwanamasumbwi, hakuna ubishi ndiyo mchezo ulioshika dunia kwa sasa.

 

NYILAWILA (KUSHOTO)

Hakuna anayeweza kukataa kuwa hapa nyumbani kuna wachezaji wenye uwezo mkubwa katika mchezo wa ngumi, wapo na wengine wamepita, lakini maisha yao yako vipi.

Kama utasema mchezo wa ngumi haufai, basi vipi Mayweather amefikia hapo alipo, hata kama ni Marekani. Vipi wanamasumbwi wa hapa nyumbani wasiwe angalau na uwezo wa maisha mazuri, tatizo ni nini? Wao au watu wengine?

Kote kuna tatizo, ndiyo maana unaona pamoja na umahiri wa Rashid Matumla na ndugu zake ambao sasa wameangukia kwenye matatizo mengine, utagundua hakuna msingi mzuri katika mchezo huo.

Msingi uliopo ni ule wa watu wachache kufaidika kupitia mchezo huo na kuendelea kuwatafuna mabondia ambao wanakuwa wanabaki na majina yao makubwa, lakini wasiokuwa na chochote mfukoni inapofikia wakati wa kustaafu!

Maisha ya Matumla kwa sasa, si sahihi! Anaishi katika kundi la watu wasio na uhakika na kesho kimaisha. Ni maisha magumu lakini wako walifaidika na fedha zake na sasa wanaendesha maisha mazuri kabisa.

Ndiko anakokwenda Francis Cheka, Karama Nyilawila na wengine ambao vipaji vyao vilipaswa viwalipe vilivyo kwa sasa na wangeachana na kazi ya ukondakta, uuzaji chupa na makopo na hasa ukabaji, maana inaelezwa ni kazi ya mabondia wengi hapa nyumbani wakiwemo wengine ambao ni maarufu!

Nani anawasaidia mabondia, mameneja walio nao ni wa aina gani, uwezo wao ukoje? Wanachotaka kufanya ni kwa ajili ya nini, kumsaidia bondia na wao kupata angalau kidogo au wao kupata kingi na bondia apate angalau?

Kwa promota ni nani, je, anaijua thamani ya mchezo wa ngumi au anaona mabondia ni watu ‘ize’ tu, hivyo anawachukulia ‘poa’ na anaweza akafanya lolote kwa kuwa anaamini ni watu njaa. Na kama wana njaa halafu anaendelea kuwanyoya, kinachofuatia nini? Jibu ni kifo.

Lakini kama kuna mabondia makini, wanahitaji mameneja, wako tayari kuwasikiliza na wao wanaweza kuwa makini na waenda kwa misingi sahihi bila ya kuelwa sifa kama ambavyo tumekuwa tukiona kwa watu wengi maarufu?

Hali halisi inaonyesha kuna tatizo kubwa kwenye pande tatu, yaani mameneja wa mabondia, mapromota na mabondia wenyewe.

Lakini kwa kuwa wote ni wadau wa mchezo huo, lazima wakubali huu ndiyo wakati wa kuamka, waujenge mchezo huo halafu ikiwezekana wakubali wote kula kidogokidogo, maana yangu wagawane katika hali kila mmoja ataweza kufaidika na mchezo ukaendelea kufanya vizuri kwa heshima na mafanikio ili uzidi kukuwa zaidi na kuwaingizia zaidi.

Kuunyonya mguu unaokubeba ni kujizuia kutembea kwa mwendo mzuri uliouzoea. Ikifikia hapo, wengi watakupita kama ilivyo sasa.

Maana wakati mchezo wa bondia unashika namba moja kwa malipo duniani, mabondia wa Tanzania wenye majina makubwa na vipaji vya juu, wanaendelea kubaki na majina makubwa juu, lakini wakiishi katika maisha magumu, mabaya wasiyostahili.

Shikamaneni, jikomboeni na muamini mchezo wa ngumi una nguvu sana. Maana hata hapa nyumbani kila mmoja anajua unashika nafasi ya pili kwa umaarufu baada ya soka.

Sasa vipi wanasoka angalau wanaweza kuishi maisha mazuri halafu wanamasumbwi wanabaki kama kichekesho. Ukimaliza kusoma makala haya, kama wewe ni mwanamasumbwi au mdau wa mchezo huo, tafadhari rudia mara moja, weak gazeti chini, chagua mkono shavuni au kichwani, halafu tafakari udhaifu wako uko wapi, halafu rekebisha, tukikutana, utanipa jibu, ila usitumie muda mwingi kulaumu!

	Total	Salary	Endorsements	Sport
Floyd Mayweather	$105m	$105m	$0m	Boxing
Cristiano Ronaldo	$80m	$52m	$28m	Football
LeBron James	$72.3m	$19.3m	$53m	Basketball
Lionel Messi	$64.7m	$41.7m	$23m	Football
Kobe Bryant	$61.5m	$30.5m	$31m	Basketball
Tiger Woods	$61.2m	$6.2m	$55m	Golf
Roger Federer	$56.2m	$4.2m	$52m	Tennis
Phil Mickelson	$53.2m	$5.2m	$48m	Golf
Rafael Nadal	$44.5m	$14.5	$30m	Tennis
Matt Ryan	$43.8m	$42m	$1.8m	American Football