MAKALA: SASA WAKATI MWAFAKA WA KUILIPA BIN SLUM TYRES KWA UJASIRI WAKE

UZI HUO WA WAZEE WA STAND UNITED PALE SHINYANGA

Kampuni ya Bin Slum Tyres kupitia matairi yake ya Double Star jana imeendelea kuonyesha kujali na kuthamini mpira wa Tanzania baada ya kuingia mkataba wa kuidhamini Stand United ya Shinyanga.

Bin Slum Tyres imesaini mkataba wa mwaka mmoja ambao thamani yake ni Sh milioni 50.

TUKIO LA KUSAINI MKATABA

Baada ya mkataba huo, mlezi wa Stand United ambaye ni mbunge wa Shinyanga, Steven Masele naye akahamasika na kutoa basi aina ya Toyota Coaster lenye thamani ya Sh milioni 45.

Yote haya ni mambo mazuri sana kisoka katika mkoa wa Shinyanga na kanda ya Ziwa kwa ujumla kwa kuwa ni sehemu yenye vipaji lundo lakini imekuwa ikisonga kwa mwendo wa kinyonga.

Masele pia safi ingawa ni mwanasiasa lakini ni vizuri kwa kuwa ametoa kwenye mpira badala ya wanasiasa wengi ambao wamekuwa wakijifaidisha tu na soka bila ya kufanya lolote.

Lakini kama ni hongera au pongezi kubwa inapaswa kwenda kwa Bin Slum Tyres ambaye anaonekana kuwa na jicho la mwewe au tai.

Lina uwezo mkubwa wa kuona mbali, lakini pia ni ujasiri mkubwa uliochanganyika na mapenzi kwa mpira wa Tanzania hata kama itakuwa ni suala la kibishara.

Jiulize makampuni mangapi tena yale ya watu binafsi kama Bin Slum yalivyo na uoga wa kuingia kudhamini mpira wa Tanzania hata kama yanajua kuna faida.

Uoga wa makampuni hayo unataokana na kutokuwa na uhakika wa mambo, kila mtu anajua mpira wa Kitanzania, mambo mengi hayana uhakika.

Tayari kampuni hiyo imeingia mkataba wa zaidi ya Sh milioni 350 na Mbeya City, huu ni wa miaka mitatu.

Sasa na Stand United kwa Sh milioni 50 kwa mwaka na inawezekana wako wanaweza kuona ni mdogo sana.

Lakini jiulize mdhamini gani anaweza kufanya hivyo kwa timu ambayo ndiyo inapanda daraja bila ya kujua mwenendo wake?

Bin Slum Tyres imejaribu, imejiamini na imeipa nguvu Stand United, yenyewe ndiyo ina kazi ya kuionyesha kampuni hiyo kuwa haikukosea na baada ya msimu ujao iongeze dau na kusaini mkataba mwingine mzuri zaidi.

Biashara na timu za soka bado inaweza kuwa patapotea hapa nchini, lakini Bin Slum Tyres imekuwa na ujasiri wa kuingia na kujaribu kitu ambacho kimeyashinda makampuni mengi sana.

Kwangu nasema bravo Bin Slum Tyres, kabla ya kuanza kwa msimu ujao mmekuwa mfano wa kuigwa na kuna kila sababu ya makampuni mengine kuiga.

Lakini kwa wadau wa soka pia wanapaswa kuwa na mfumo mzuri wa kuendelea kuwabakiza wale walio tayari kuendelea kusaidia mpira.

Binafsi kama nikitaka betri au matairi ya gari langu, basi kwanza nitaanza na Bin Slum Tyres kwa kuwa wao wanaudhamini mchezo tunaoujali, tunaoutaka na ndiyo furaha yetu.

Kununua bidhaa zao ni kuwapa faida, ndiyo. Lakini wakipata faida, maana yake watajua mpira umewasaidia kupata faida, hivyo hawataondoka.