MAKALA: TUMPE LIFTI NOOIJ

Na Saleh Ally

KOCHA Mkuu wa timu ya soka ya taifa, Taifa Stars, Mart Nooij ambaye ni mpya, tayari ana rekodi unayoweza kusema ni nzuri kwa kocha wa aina yoyote ambaye ndiyo amekabidhiwa timu.

 

Nooij ameingoza Taifa Stars katika mechi nne, mbili zikiwa za mashindano na zilizobaki ni za kirafiki dhidi ya timu moja ya Malawi.

Katika mechi ya kwanza ya kirafiki dhidi ya Malawi, matokeo yalikuwa suluhu na timu hizo ziliporudiana jijini Dar es Salaam, Stars ikakishinda kikosi hicho cha The Flames kwa bao 1-0.

Kwa upande wa mechi za kimashindano, pia ni mbili dhidi ya timu moja. Stars iliivaa Zimbabwe katika mechi ya kuwania kucheza hatua ya makundi ili ipate nafasi ya kushiriki Fainali za Kombe la Mataifa Afrika nchini Morocco, mwakani.

Mechi ya kwanza dhidi ya Zimbabwe, Stars ikashinda kwa bao 1-0 jijini Dar es Salaam, baada ya hapo ikafunga safari kwenda Harare, Zimbabwe ambapo ilitoka sare ya mabao 2-2 huku wenyeji wakilazimika kusawazisha.

Stars imesonga mbele, sasa inakutana na timu ya zamani ya Nooij, hiyo ni Msumbiji au Mambas na ni mechi ambayo itatoa majibu kama Taifa Stars itakwenda katika hatua za makundi au la.

Kwa wenye kumbukumbu, mara ya mwisho, Msumbiji ndiyo iliyoing’oa Stars katika kinyang’anyiro cha kuwania kucheza Kombe la Mataifa Afrika. Sasa inakutana tena na timu hiyo na haitakuwa lelemama.

Nooij ameonyesha ana uwezo, kikosi chake hata kama hakikucheza vizuri nyumbani dhidi ya Zimbabwe, kimekuwa na uhai na angalau kuna matumaini katika hatua ya kwanza.

Hakuna ubishi kama kocha huyo atakwama, basi ajue Watanzania na wadau hawatakaa kimya na kama kawaida, atavurumishiwa madongo na ikiwezekana atatupiwa virago aende zake.

Lakini kwa kuwa ameanza kuonyesha njia ya matumaini, basi kuna jambo la kufanya mapema ili asiingie kwenye njia ya kuharibu, si nyingine zaidi ya kumsaidia ili afanye vizuri.

Kuna wadau wengi wanaohusika na timu ya taifa, ingawa huduma za timu hiyo ni chini ya Shirikisho la Soka Tanzania (TFF), lakini ni timu ya Watanzania, wenye mali ni mimi na wewe.

Hivyo huu ndiyo wakati mwafaka wa kumpa lifti kocha Nooij, kwa yule anayeona ana nafasi ya kuisaidia Stars na kocha huyo basi afanye hivyo ili kampeni hiyo ambayo mara ya mwisho ilikuwa na mafanikio mwaka 1980, ifanikiwe tena.

 Viongozi:

Wapo wengi wenye nafasi ya kutoa mchango wao, mfano wale wa Yanga, Simba, Azam FC, Mtibwa Sugar na timu nyingine wanaweza kuwa na mchango wao wa hali na mali na wakaufikisha TFF.

TFF wanapaswa kuamini wanaopeleka maoni, hasa viongozi ni wazalendo, hivyo yapokewe na kusaidia mafanikio ya timu. Mwenye uwezo wa kutoa fedha pia ajitokeze.

Kikubwa, siasa za soka zikae kando, wasiwepo wapinzani wa Rais wa TFF, Jamal Malinzi wanaoona timu ikishinda ni mafanikio yake, wakataka kuharibu, hilo lipo!

Wachezaji:

Wachezaji na memba wengine wa benchi la ufundi wao wana nafasi kubwa zaidi ya kumsaidia kocha huyo kwa kuyabeba maelekezo yake kwa ufasaha na baada ya hapo wapambane vilivyo.

Mafanikio yakipatina, bado sifa itakwenda kwao kutokana na kazi yao nzuri ingawa bado bosi wao, Nooij atakuwa amefanikiwa pia na itakuwa furaha kwa Watanzania.

Mashabiki:

Utagundua kila mtu ana nafasi yake ya kuisaidia Stars, naamini hata makala haya yameisaidia Stars hivyo na mimi nimo!

Kila Mtanzania ana nafasi hata kama atawakilishwa na wale wanaokwenda mazoezini au kwenye mechi, bado litakuwa jambo bora.

Sahihi ni kwenda uwanjani na kuishangilia Stars kwa nguvu, wale ambao wamekuwa wakizomea wachezaji ni wasaliti. Haitakiwi kuwa hivyo kwa kuwa hakuna mchezaji anayenuia kukosea.

Ndiyo maana kuna marekebisho kupitia maelekezo ya mwalimu wakati timu inacheza. Kama kuna mtu anaizomea timu ya taifa lake ikipambana, basi bora abaki nyumbani na si kwenda kugeuka kuwa mpinzani mwenye uraia wa Tanzania!