KABURU ASISITIZA ANA IMANI KUBWA NA KAMATI YA NDUMBARO

NDUMBARO AKIWA NA BAKHRESA AMBAYE NI MJUMBE WA KAMATI YAKE

 Mgombea wa nafasi ya Umakamu wa Rais wa Simba, Geofrey Nyange ‘Kaburu’, ametoa ya moyoni mwake juu ya maendeleo ya mchakato wa uchaguzi huo, akasema wazi kwamba ana imani kubwa na kamati nzima ya uchaguzi huo iliyo chini ya mwenyekiti, Dk Damas Daniel Ndumbaro.

Kaburu ambaye anawania nafasi hiyo pamoja na Sued Nkwabi, Bundala Kabulwa na Jamhuri Kihwelu ‘Julio’, amesema mpaka sasa walipofikia bado hajaona dosari ya kamati hiyo na anavutiwa na jinsi wanavyoendesha zoezi hilo kwa umakini zaidi.

“Kwa kweli uchaguzi unakwenda vizuri na niseme tu kwamba nina imani kubwa na kamati ya uchaguzi na nimekuwa nikivutiwa na utendaji wao wa kazi mpaka hapa tulipofikia na imenijengea kuamini pia uchaguzi huu upo kwenye mikono salama.

“Nafikiri zoezi litaisha kwa amani kabisa kwa sababu tunaongozwa na katiba na kanuni ambazo zipo wazi na kila mmoja anazofahamu, kwa hiyo ni kuvuta subira tu mpaka pale zoezi la kupiga kura litakapowadia,” alisema Kaburu.