MASHABIKI MBEYA CITY WAELEZEA UDHAMINI WA BETRI ZA RB UTAKAVYOWABEBA

KATIKA suala la idadi ya mashabiki hapa nchini ukizitoa Simba na Yanga, inafuata Mbeya City, hili linajidhihirisha pale inapotokea timu hiyo inapambana uwanjani na timu nyingine, utaona umati wa watu walio nyuma ya timu hiyo ukiutaka ushindi kwa udi na uvumba.

Mashabiki wa City ambayo ilipanda ligi kuu msimu uliopita na kufanikiwa kushika nafasi ya tatu, wanasifika kwa uzalendo mkubwa walionao kuhusu timu yao katika kuungana kwa pamoja kuisapoti timu ya mkoa wao, hili limekuwa likiwapa faraja hata viongozi wa timu hiyo na kuwaweka kama moja ya chachu za ushindi wa timu hiyo.

Lakini pamoja na hayo, mashabiki hao tayari wametengeneza matawi yao ya ushangiliaji pamoja na mikakati mingine ya kuisaidia timu kwa namna moja au nyingine katika kuhakikisha inapata mafanikio zaidi.

Mbali na hayo, mashabiki hao pia wanazungumzia mengi kuhusiana na timu yao hiyo ikiwemo furaha, hofu na hata presha wanayoipata kutokana na timu yao.

Championi Jumatano lilizungumza na baadhi ya mashabiki wa Tawi la Wakali wa Donta, lililopo maeneo ya Uhindini mkoani hapa ambapo Bernard Guga na Kelvin Mkwaza, waliwawakilisha wenzao wa tawi hilo na kuzungumza yafuatayo:

Mbeya City ndiyo faraja pekee ya soka mkoani hapo

“Yaani kabla haijaja hii Mbeya City, sisi wakazi wa hapa tulikuwa hatuna timu ya kushangilia kwa sababu Prisons ilikuwa imetutenga kwa hiyo tukawa tupotupo tu, tukawa tunasubiri timu za Dar zikija ndiyo tunamaliza kiu yetu ya kushangilia soka.

“Lakini tangu kuanzishwa kwa Mbeya City sasa tuna amani sana na tunaona raha ya mpira,” anasema Benard.

Simba, Yanga ndiyo zinatupa presha ya kufika tunapotaka

“Kama ni soka tu, kwa kweli huwa tunazihofia hizi timu za Simba, Yanga na Azam, maana zinapiga kweli mpira na hata ikifika siku tunakutana nazo, basi tunakuwa na hofu kwelikweli, tunajua leo tunakwenda uwanjani kushangilia ila kazi ipo.

“Lakini muda mwingine huwa tunazihofia kwenye suala la kununua mechi na vitu kama hivyo, kwa sababu hutumia ukongwe na pesa zao kujipatia matokeo, ingawa hatuna ushahidi katika hilo, lakini kuna vitu huwa tunaviona uwanjani vinavyoonyesha kabisa kwamba hapa mshindi ameshapangwa.

Hatuwezi kuwashangilia Prisons hata siku moja

“Yaani hawa Prisons sasa imefika hatua tumewatengea kabisa jukwaa lao, kwa sababu hawafiki hata 20, wanataka upinzani na sisi halafu hawana mashabiki wa kuweza kushindana na sisi.

 “Wakicheza na timu za mikoani sisi huwa tunawazomea wafungwe, halafu na sisi tukicheza, wao wanakuwa upande wa wapinzani. Kwa hiyo hayo ndiyo maisha yetu na haitakuja siku tuwashangilie tena kwa sababu walituudhi walipotutenga mara ya kwanza.

Azam walituudhi sana msimu uliopita

“Hakuna siku tuliyoumia na kuudhika kama kwenye mechi ya marudiano na Azam tuliyofungwa 2-1 msimu uliopita.

 “Yaani mpira unaendelea lakini unaona kabisa hapa kuna fitna imefanyika na matokeo yameshapangwa tangu awali, tuliumia sana siku hiyo na tangu hapo tukaapa kuwa ukiwatoa Prisons wapinzani wetu wengine ni Azam kwenye ligi,” anamalizia Benard.

Kuondoka kwa kocha ni pigo kubwa kwetu

“Ngoja nikwambie ukweli kaka, unajua kuondoka kwa Maka (Mwalwisi, aliyekuwa kocha msaidizi wa Mbeya City ambaye sasa anaifundisha Panone FC ya Arusha) ni pengo kubwa kwa kweli, ukiachana na ualimu wake mzuri lakini jamaa alikuwa na uwezo wa kuwaleta pamoja wachezaji, kuwapanga na kuwatoa hofu ya mechi.

“Yaani hata mchezaji akiwa mtukutu lakini yeye alikuwa na uwezo wa ‘kumcontrol’ na kumweka sawa na mambo yakaenda, sidhani kama kuna mtu atakuja kuziba pengo lake,” alisema Machaza.

Kuhusiana na hilo shabiki mwingine ambaye hakutaka kutaja jina lake, alisema: “Kuondoka kwa Maka ni pigo kwetu, ingawa hawezi kutusababisha tukafeli msimu huu lakini kwenye pengo kuna pengo tu.”

Benard akamalizia: “Maka alikuwa na ufundi wake katika vitu vingi ikiwemo hata kuvumbua vipaji lakini hata aliyekuja pia tutamwamini na kuangalia kazi yake.”

Tuna hofu kubwa sana msimu huu

“Sisi matumaini yetu tunataka tuzidi kusonga mbele zaidi ya hapo tulipo sasa, lakini kwa kuwa ile ligi haitabiriki basi hata kama tukifanya vibaya, tusitoke kwenye zile nafasi nne za juu.

“Kuhusu hofu yetu kwa sasa unajua wengi wameshatujua kwamba sisi ni wazuri na tumeshakuwa moja ya timu ngumu, kwa hiyo tutakapokutana na timu yeyote ile mechi itakuwa ngumu.”

Akikosekana Yeya, Nonga tunakuwa hoi

“Sisi tunaipenda timu kwa ujumla lakini kama ikitokea siku, mmoja kati ya Anthon Matogolo, Mwegane (Yeya) na Nonga (Paul) anakosekana, basi kidogo tunaingiwa na wasiwasi kwa sababu hawa wachezaji ni watu wa matokeo muda wowote.”

Vipi kuhusu udhamini wa Bin Slum

“Kwa kweli kuhusu huu udhamini mpya tulioupata kutoka kwa Bin Slum kupitia betri zake za RB ni mzuri na tunaamini kupitia udhamini wake huo, tunaweza kufanya vizuri na kusonga mbele zaidi,” anasema Makwaza.