HOJA YANGU…KAMATI YA DOMAYO HADI LEO KIMYA, SASA KAMATI YA TAIFA STARS!

RAIS WA TFF, JAMAL MALINZI.

SHIRIKISHO la Soka Tanzania (TFF) linazidi kujaza vituko na mwendo linaokwenda nao sasa linageuka na kuwa mambo mengi yanayoshangaza, yanayochekesha na yanayoashiria kuwa maendeleo kwenye mpira yatazidi kuwa ndoto.

Wako wataona TFF inasakamwa, lakini si watu wa kuhofiwa kwa kuwa ni hisia zao, acha waamini wanachokiamini, ukweli utafanya kazi yake hata kama itachelewa kuthibitika.

Unakumbuka wakati wa usajili wa msimu huu wa 2014-15, TFF iliamua kuunda kamati ya uchunguzi wa kiungo wa zamani ya Yanga, Frank Domayo ambaye alisajiliwa akiwa kwenye kambi ya timu ya taifa jijini Mbeya.

TFF ilitangaza kupinga wachezaji kufanya usajili wakati wakiwa kwenye kambi ya taifa. Yanga wakalaumu kuhusiana na hilo na TFF ikatangaza kuunda kamati ambayo ingetoa majibu juu ya hilo.

Leo ni zaidi ya miezi miwili, kimya, hakuna lolote jipya na TFF imekaa kimya huku Domayo akiendelea kucheza.

Lengo langu si Domayo azuiwe kucheza Azam FC, au ionekane kuna tatizo. Ninachosisitiza hapa ni majibu ya suala lenyewe, kwamba TFF ilipaswa kulifanyia kazi na kuweka mambo wazi kwamba hakukuwa na tatizo au lilikuwepo. Majibu yalikuwa ni lazima kwa kuwa jambo lenyewe lilitangazwa hadharani na watu wanaendelea kusubiri.

Ukimya wa TFF hadi sasa, maana yake kuzungumzia suala la kamati ilikuwa ni kutaka kuwapoza wapenda soka kwa mgongo wa chupa, kumbe hakuna lolote. Sasa TFF imetangaza kuunda kamati ya kuhujumiwa kwa Taifa Stars.

TFF inaamini Taifa Stars imetolewa kwenye michuano ya kuwania kucheza Kombe la Mataifa Afrika baada ya kuhujumiwa! Hivyo imeunda kamati ambayo itachunguza, nasikia kuna vigogo watahojiwa.

Msisitizo wangu hapa ni mambo mawili, kwanza ni kwa kamati yenyewe ni lazima isiwe kamati bubu ambayo inatangazwa tu halafu baada ya muda inapotea na hakuna chochote kinaelezwa.

Kwa kuwa kamati imetangazwa hadharani kama ile ya Domayo, basi vizuri majibu yake pia yatoke hadharani ingawa hata wakati inatangazwa, hakukuwa na ufafanuzi wa kutosha kwa nini Stars ilihujumiwa.

Kwamba TFF waliona kikosi kilikuwa katika hali nzuri sana, hivyo kuondolewa na Msumbiji ilikuwa ni hujuma? Iko haja ya kutafakari hilo sana.

Kitu cha pili, mimi naona hiyo kamati ya Taifa Stars ni kutaka kupoteza muda, fedha na mipango mingine ya shirikisho hilo kutaka kuwapotezea muda.

Pia ninaona kamati hiyo inatengenezwa kwa lengo la kutaka kuwakomoa baadhi ya watu au kuwachafua tu kupitia kigezo hicho. Ambacho ninaweza kusema, TFF ina kila sababu ya kufanya juhudi katika soka la vijana.

Fedha ambazo zitatumika kwenye kamati hiyo, nguvu itakayotumika kuunda kamati, kuwasiliana na hata kukaa kwa ajili ya kuwahoji watu, ingeelekezwa kwa vijana ambao watalisaidia taifa letu hapo baadaye.

Taifa Stars tuliona ikicheza kwa kiwango kizuri katika kipindi cha kwanza dhidi ya Msumbiji, ilikuwa angalau. Kipindi cha pili ikazidiwa kabisa, hakuna asiyekumbuka hilo.

Sasa kama kulikuwa na hujuma, basi ianzie kwa kocha, wachezaji na TFF yenyewe kwamba Watanzania tulikuwa nyuma ya timu kwa kila hali, lakini ikashindikana na ilikuwa vigumu kuingia kuwasaidia.

Siamini kama kamati hiyo pia itakuwa ni sehemu ya TFF kuendelea kutaka kupoza mambo kwamba inaonewa, inahujumiwa na kuwaambia Watanzania kuna kamati imeundwa ili kupoza mambo na kuwasahaulisha machungu yao dhidi ya madudu ya TFF na sasa timu ya taifa.