SASA HUYU HASHEEM THABEET WA NINI SASA?

Na Saleh Ally

NILISHIRIKI kwenye programu maalum ya Didier Drogba kwa ajili ya kuwahamasisha vijana raia wa Ivory Coast kutamani kupata mafanikio makubwa kupitia uhamasishaji wa nyota huyo.

Nikashuhudia programu nyingine na Victor Wanyama, nahodha wa timu ya taifa ya Kenya ‘Harambee Stars’ akiwahamasisha watoto wanaoishi kwenye mazingira magumu, kwamba siku moja nao wanaweza kuwa wachezaji bora tegemeo wa Kenya ambao wanacheza soka la kulipwa na kupata mishahara mikubwa.

Programu hizo mbili za Abidjan na Nairobi, zimekuwa zikinifanya nikumbuke nyumbani mara kadhaa, kwamba Tanzania tunaweza kufanya hivyo kupitia nani? Kweli tuna wanamichezo wengi lakini wako wanaoweza kuwa msaada zaidi.

Hasheem Thabeet Manka ndiye mwanamichezo maarufu zaidi kwa hapa nyumbani. Anacheza ligi kubwa zaidi kwa maana ya kiwango, ameweka rekodi ya kuwa Mtanzania wa kwanza kucheza Ligi ya Kikapu Marekani (NBA).

Thabeet analipwa zaidi ya dola milioni 1 (zaidi ya Sh bilioni 1.6) kwa mwaka. Pia ni mwanamichezo ambaye karibu kila siku ya uhai wake anaitangaza Tanzania kwa kuwa wengi wangependa kujua kuhusu yeye na nchi gani anayotokea.

Ndiyo maana hata baada ya Rais Barack Obama wa Marekani kufanya ziara nchini, alimtaja Thabeet kwamba ana habari zake kwa kuwa amecheza kwenye timu za NBA.

Marekani ina watu zaidi ya milioni 300, jiulize vijana wangapi wangependa kuwa nyota wa mpira wa kikapu, wangapi wana ndoto ya kucheza NBA? Wengi sana lakini wameshindwa na Thabeet ambaye katokea nchi ambayo mchezo huo hata haupewi kipaumbele.

Nani anawaza kuhusu kumtumia Thabeet kwa ajili ya kuhamasisha watoto, vijana na wengine wenye malengo ya kufanikiwa? Ni mwanamichezo huyo pekee ambaye utaona amefika mbali kuliko wengine wote nchini, lakini zaidi kwa juhudi zake binafsi.

Utaona asilimia kubwa ya wanamichezo au wadau wa soka wamekuwa wakitumia muda mwingi kumlaumu Thabeet, kwamba hapati nafasi ya kucheza au vinginevyo. Lakini wanajisahau au hawajui kuhusiana na alifikaje hapo.

Wakati anapita kwenye draft ambayo inahusisha wachezaji zaidi ya 500, Thabeet alishika nafasi ya pili kwa ubora. Wanaokuwa katika nafasi za juu 20 wanakuwa na kiwango cha kucheza NBA.

Wapo wanaosema kwamba Thabeet anaendekeza starehe, ndiyo maana hapati nafasi ya kucheza, hawajiulizi maswali ya msingi, kwamba ushindani anaokutana nao ni wa kiasi gani. Mfano Oklahoma City Thunder alikuwa anacheza na wachezaji kama Kevin Durant na wengine.

Wamarekani au wale wanaotokea nchi za Ulaya, wamecheza mpira wa kikapu miaka nenda rudi. Wamekuwa kwenye shule zinazoshiriki mchezo huo, usisahau wamehamasishwa na wachezaji wengi nyota kama Earvin ‘Magic’ Johnson, Michael Jordan na wengine wengi.

Thabeet amesomea shule ipi yenye kiwango kizuri au cha juu cha mpira wa kikapu? Au nani alimhamasisha kufikia hapo alipo? Maana amewapita Watanzania wote kufikia kiwango hicho!

Yako ya kujifikiria na kumpongeza. Simaanishi asikosolewe, lakini si vema kumkatisha tamaa na asingekuwa na lolote timu ya 76eras iliyomnunua kutoka Oklahoma City Thunder isingekubali kutoa zaidi ya dola milioni 1  ili kuipata huduma yake.

Ndiyo maana nasisitiza kuwa, tuna bahati ya kuwa na Thabeet, inawezekana ni zawadi kutoka kwa Mungu lakini hatuitumii. Nani anafanya programu za kuinua na kuendeleza vijana, kumpa nafasi awasaidie vijana kuhamasika kwamba inawezekana?

Thabeet  ni mtoto wa maskini tu, marehemu Thabit Manka. Msomi aliyeilea familia yake kwa makuzi mazuri akishirikiana kwa kila hali na mkewe. Inawezekana hiyo imemsaidia Thabeet  kufika alipo sasa.

Hapa naiona faida ya Thabeet mara mbili, kwanza nguvu ya malezi aliyopata, lakini nguvu ya maneno na mafunzo anayoweza kuyatoa kupitia njia alizopita, ugumu ulivyokuwa, kutovunjika kwake moyo na hadi kufikia yalipoanza kuonekana mafanikio na baadaye kupatikana.

Serikali inafanya nini kupitia wizara husika kumshawishi Thabeet kufanya programu maalum kama zile za kina Drogba na Wanyama? Nini kinashindikana hapo?

Ninaamini Thabeet  angekuwa Mkenya au kutoka Ivory Coast wala wasingelala kama ilivyo kwetu Tanzania ambao kila kitu tunaona rahisi tu huku lawama zikiwa nyingi hata kwa wale ambao hawajafanikiwa na lolote.

Wakati mwingine naamini ni roho mbaya au wako wanaoamini kufanya hivyo kutachangia Thabeet  ajulikane zaidi. Lakini tunapoteza bahati kubwa ya kuwasaidia watoto na vijana wetu.

Tusimuache Thabeet kila akirudi nyumbani likizo, eti ajitolee yeye mwenyewe kuwafundisha vijana. Liandaliwe fungu maalum ikiwezekana atembee hadi mikoani ili kuwahamasisha vijana walio tayari kucheza mpira wa kikapu lakini bado wanaamini haiwezekani na huenda alipofika yeye ni bahati nasibu au alitakiwa kufika yeye tu na hakutakuwa na mwingine.

Najua mambo ya serikalini ni kama kobe, watu wengi si wabunifu na wanaona sawa kufanya mambo kupitia utaratibu wa kawaida na ikaonekana poa tu. Lakini huu ndiyo wakati mwafaka wa kubadilika.

SOURCE: CHAMPIONI