HOJA YANGU....MAMBO YA KUCHEKESHA KATI YA YANGA, SIMBA NA OKWI!

NAWEZA kutofautiana na watu wote katika suala la kugombewa kwa mshambuliaji Emmanuel Okwi, lakini nitaendelea kusisitiza hivi, suala hili linaongozwa kishabiki sana badala ya utaalamu.

Sifa ya binadamu mwema, kwanza kabisa ni kuwa mkweli, ndiyo kitu kitakachokuongoza kwenda kwenye mambo mengine mema. Uoga ni utumwa, achana nao.

Funga macho yako mawili, vuta pumzi na kuitoa halafu anza kutafakari kama kweli Yanga na Simba zinapaswa kutumia nguvu nyingi kiasi hicho kumgombea Okwi? Utapata jibu, tukikutana, tutajadiliana.

Kabla ya kukutana acha nikueleze ninachoamini kwamba, Yanga na Simba zinaongozwa na ushabiki ambao hauna manufaa. Kwa kuwa zingeweza kufanya mambo mengi ya msingi kuliko kumgombea Okwi.

Inawezekana huu ulikuwa ni wakati mwafaka wa Yanga kuonyesha wazi kuwa unadai nini hasa kwa Okwi, kama kweli barua yao imeonyesha walitaka kuvunja mkataba, Okwi amewarahisishia kuuvunja huo mkataba.

Jiulize Yanga wanapaswa kumdai Okwi sasa, wa nini kama walitaka kuvunja naye mkataba. Kama wana madai mengine, basi hayo wayashikilie na ndiyo maana nasema, kama ni kesi ya Kamati ya Sheria ya Hadhi za Wachezaji ya TFF kumruhusu kucheza Simba, hilo halipaswi kuiumiza Yanga.

Tokea mwanzo, ilionyesha haina shida naye. Hivyo sasa ni wakati wa kulilia stahiki nyingine mfano madai ya fedha, lakini si kupambana eti hawezi kucheza Simba. Mfano akibakizwa Yanga, je, itakuwa tayari kumtumia?

Katika hali ya kawaida jibu ni hapana na inaonyesha wazi kwamba haimtaki, sasa kwa nini iendelee kupambana kumpata? Ndiyo kichekesho cha kwanza.

Kwa Simba, bado kuna hali ileile ya kuchekesha. Kama unakumbuka Okwi aliuzwa kwa Etoile du Sahel ya Tunisia kwa dola 300,000 (Sh milioni 480), lakini kabla ya hapo ilimlipa dola 40,000 ambazo zilipotea bure.

Hadi leo Simba haijalipwa fedha zake na ina kesi ya madai kuhusiana na mchezaji huyo. Inajulikana hakukuwa na uamuzi uliopitishwa Okwi kufikia kuichezea Yanga, mwisho ikaonekana inafaa.

Sasa Simba nayo imeingia tena kwenye mkumbo huo wa Okwi, hii ni kuonyesha kwamba imekubali kuzipoteza fedha zile dola 300,000. Yaani imenyoosha mikono haiwezi kuzipata?

Kama Simba itakuwa inazihitaji fedha hizo, bado Etoile nayo inaweza kuwa na sababu ya uhakika sasa kutoilipa Simba hata senti kwa kuwa mchezaji inayetaka ilipwe, tayari yuko Msimbazi tena.

Kama Simba bado inataka ilipwe, kuwa na Okwi tena haioni ni kupoteza fedha hizo au kujiwekea ugumu zaidi? Na kama imeamua kuzisamehe, je, Okwi wa sasa ana thamani ya fedha hizo milioni 480?

Ndiyo maana naona mchezo huu wa Okwi umetawaliwa sana na ushabiki, mfano Simba kuonyesha imelipa kisasi baada ya Yanga kumchukua Okwi wakati wenyewe wakiendelea kuidai Etoile.

Lakini Yanga nayo iko tayari kupoteza fedha zaidi ili iweze kuionyesha Simba ambaye ni mtani wake kwamba inaweza zaidi yake. Unajua watu wanaoshindana wanavyopenda kushindana bila sababu za msingi, ndivyo wanavyofanya watani hawa.

Vizuri kujitambua, vizuri kujiamini na mwisho kuamua kitu ambacho ni sahihi kwa maslahi ya klabu, si kwa maslahi ya kuwafaidisha mashabiki au wanachama kitu ambacho kimekuwa kikichangia kwa muda mwingi viongozi kufanya maamuzi ambayo si sahihi.

Viongozi wengi wamekuwa wanafanya maamuzi yanayolenga kuwaonyesha mashabiki na wanachama. Kweli Yanga ina haki ya kudai stahiki zake kwa kuwa Okwi alikuwa na makosa, lakini ni sahihi kumpigania asicheze Simba? Simba nao wana sababu ipi ya kuona Okwi ni muhimi sana? Hawataki fedha zao dola 300,000? Wakimchukua hawaoni wanaua nguvu ya kesi hiyo? Je, hawakuwa na nafasi ya kupata mchezaji mwingine mwenye uwezo hata zaidi ya Okwi? Shidaaaa.