KIBADENI ASEMA KESI YA MAMILIONI YA YANGA INAMVURUGA OKWI

OKWI WAKATI AKIWA YANGA

Aliyekuwa Kocha wa Simba, Abdallah Kibadeni, amefunguka kuwa tatizo linalomtesa mshambuliaji wa Simba, Mganda, Emmanuel Okwi kiasi cha kushindwa kuonyesha kiwango kama zamani ni kutokana na madeni ya Yanga yanayomkabili.

Okwi aliyesajiliwa Simba hivi karibuni akitokea Yanga, amekuwa na vuta nikuvute na viongozi wa klabu hiyo ambayo inamdai fedha nyingi kutokana na kutoichezea timu hiyo ipasavyo msimu uliopita ikiwa ni pamoja na kuondoka.

Yanga ilipeleka malalamiko yake Shirikisho la Soka Tanzania (TFF), ikimdai Okwi kiasi cha dola 200,000 (Sh milioni 333) kama fidia ikiwa ni fedha za mishahara waliyokuwa wakimlipa na fidia ambapo hadi sasa kumekuwa na hali ya vuta nikuvute kutokana na kuliwasilisha suala hilo Fifa.

KIBADENI (KUSHOTO) WAKATI AKIWA SIMBA.

Hata hivyo, licha ya hayo yote kutokea, mchezaji huyo hajafumania nyavu hata mara moja tangu atue Simba katika timu hiyo kuanzia mechi za kirafiki hadi ile ya ligi kuu dhidi ya Coastal Union, zaidi ya kutoa pasi ya bao kwa Amissi Tambwe.

Kibadeni amefunguka kuwa, kitu ambacho kinachangia kwa kiasi kikubwa kumfanya Okwi ashindwe kucheza katika kiwango chake kilichozoeleka ni pamoja na madeni anayodaiwa na Yanga na ndiyo yanayomfanya ashindwe kuwa vizuri.

“Unajua kitu kinachochangia Okwi kutokuwa katika kiwango kizuri ni hali ya madeni inayomuandama kwani kila kukicha hutokea jambo hili mara lile, hivyo inamsababisha mchezaji kuwa na msongo wa mawazo na kushindwa kufanya vizuri.

“Kiwango chake cha sasa kimeshuka tofauti na ilivyokuwa awali, nadhani hii imetokana na kudaiwa na timu mbalimbali, anahitaji kutulia kwa kutofikiria mambo yanayomkabili ili aweze kurudi katika hali yake ya zamani kwani alikuwa mchezaji hatari.

“Nadhani hali hii ikimalizika na kutulia kabisa na kupata mtu sahihi wa kumchezesha, basi atakuwa vizuri kwa kurudisha kiwango chake,” alisema Kibadeni.

Hata hivyo, Okwi amefungua kesi ya kuidai Yanga zaidi ya shilingi milioni 111 ikiwa ni fedha iliyobaki ya usajili pamoja na kodi ya nyumba chini ya mwanasheria wake, Damas Ndumbaro.