BOSI WA SYMBION SPORTS ASEMA AZAM FC ITAITWANGA MBEYA CITY LEO

HALL (KUSHOTO) WAKATI AKIWA BOSI WA AZAM FC.

Mkurugenzi wa Symbion Sports na kocha wa zamani wa Azam FC, Muingereza, Stewart Hall, ameipa nafasi timu Azam kuibuka na pointi tatu katika mchezo wa leo dhidi ya Mbeya City kwenye Uwanja wa Sokoine mjini Mbeya.

Rekodi inaonyesha timu hizo zimekutana mara mbili ambapo Mbeya City imetoka sare mechi moja na imepoteza moja.

Hall alisema kuwa Mbeya City msimu huu imekuja kitofauti na msimu uliopita ambao walianza kwa kasi kubwa ndiyo maana walifanya vizuri si kama sasa ingawa ligi ndiyo kwanza mwanzo.

Aidha alisema kuwa Azam bado wana kiwango kizuri katika safu ya ushambuliaji na wamefunga mabao mengi.

“Si kwamba Mbeya City ni wabovu sana, hapana, ila msimu huu hawako kama walivyoanza msimu uliopita, ndiyo maana naipa zaidi nafasi Azam kufanya vyema katika mchezo wao wa leo ambao watakuwa ugenini lakini matumaini makubwa ni ushindi.

“Azam katika eneo la ulinzi na ushambuliaji wapo vizuri, ndiyo maana wana mabao mengi tofauti na wapinzani wao ambao mpaka sasa mechi tatu bao moja pekee,” alisema Hall.