USISAHAU MOROGORO DEBRY LEO, SIKILIZA MAMBO YA THOBIA KIFARU

MTIBWA SUGAR

Timu za Mkoa wa Morogoro, Mtibwa Sugar na Polisi Moro, leo zinatarajiwa kumenyana vikali kwenye mechi ya Ligi Kuu Bara katika Uwanja wa Jamhuri, Morogoro.

Kama ambavyo Dar es Salaam itakuwa na pilika za Ilala Derby au Dar es Salaam Derby, pia Morogoro wana Derby yao hiyo, watoto wa nyumbani wanakutana.

Wakati homa ikipanda, Mtibwa imeshasema inahitaji kushinda mechi sita mfululizo za mwanzo ili kuweza kujiweka kwenye nafasi nzuri katika msimamo wa ligi kuu.

Mtibwa mpaka sasa imeshinda mechi zake zote tatu ilizocheza na kufanikiwa kujikusanyia pointi tisa mkononi.

Ofisa Habari wa Mtibwa Sugar, Thobias Kifaru, amesema wamejipanga vyema kuhakikisha wanaondoka na ushindi siku hiyo na lengo lao katika mzunguko wa kwanza ni kuhakikisha wanashinda mechi sita za mwanzo.

“Tunahitaji kushinda mechi sita za mwanzo ili kujikusanyia pointi nyingi na kuwa katika nafasi za juu kwenye ligi,” alisema Kifaru.