KIONGERA, CHOLLO WAICHELEWA YANGA, WAANZA MAZOEZI GYM

Beki wa Simba, Nassor Masoud ‘Chollo’ na kiungo mshambulizi, Paul Kiongera wameanza kufanya mazoezi mepesi ya gym huku wakiendelea na matibabu ili kuhakikisha wanarejea katika afya zao na kurudi tena uwanjani kwa mara nyingine.

Wachezaji hao walipata majeraha kwa nyakati tofauti katika mechi za awali za ligi kuu, Chollo alivunjika mkono katika mchezo dhidi ya Polisi Moro na Kiongera aliumia goti kwenye mechi dhidi ya Coastal Union.

Msemaji wa Simba, Humphrey Nyasio, amesema kuwa maendeleo ya wachezaji wao kidogo yameanza kutoa matumaini ingawa hawatacheza mchezo wa leo.

“Chollo na Kiongera wanaendelea na mazoezi mepesi ya gym lakini bado hawajamaliza matibabu yao kwa sababu kama Chollo bado hajatolewa plasta ngumu (POP), zaidi anafanya mazoezi ya kukimbia pekee na Kiongera pia anafanya lakini anahudhuria kliniki pale Muhimbili kama kawaida.

“Lakini lengo letu ni kutaka kuhakikisha kuwa wanapona kabisa na kurejea tena uwanjani kwa sababu bado wanahitaji uangalizi kwa kiasi kikubwa,” alisema Nyasio.