NIYONZIMA, COUTINHO WABADILISHANA NAMBA ILI JAJA 'ALE' VIZURI

Katika mikakati ya kuvaana na watani wao Simba, Kocha Mkuu wa Yanga, Mbrazili, Marcio Maximo, amembadilishia namba kiungo wake mshambuliaji Mrwanda, Haruna Niyonzima na Mbrazili, Andrey Coutinho.

Hiyo yote ni kuhakikisha timu yake inapata ushindi katika mechi hiyo ya Ligi Kuu Bara itakayochezwa leo Jumamosi kwenye Uwanja wa Taifa jijini Dar.

Timu hizo zote mbili zitashuka uwanjani kupambana huku kila moja ikiwa na kocha mpya. Yanga inanolewa na Mbrazili, Maximo huku Simba ikiwa chini ya Mzambia, Patrick Phiri.

Kocha huyo, mara kwa mara amekuwa akiwabadilisha namba wachezaji wake kutokana na aina ya timu atakayokutana nayo katika mechi husika, hivi karibuni Maximo aliwahi kutamka kwamba hataki mchezaji anayecheza nafasi moja ndani ya uwanja, hivyo anamuandaa kila mmoja ili acheze nafasi nyingi uwanjani.

Awali, Niyonzima alikuwa akichezeshwa namba 11 kabla ya mazoezi ya wiki hii ya maandalizi ya mechi dhidi ya Simba kuhamishwa na kuandaliwa kuchezeshwa 10 iliyokuwa inachezwa na Coutinho.

Coutinho yeye amehamishiwa kucheza namba 11 kwa ajili ya kupiga krosi safi zitakazomfikia mshambuliaji Mbrazili, Geilson Santos Santana ‘Jaja’ mwenye uwezo mkubwa wa kucheza mipira ya vichwa.

Katika mazoezi ya siku hizi tatu za kujiandaa na pambano hilo, kocha huyo alionekana kuwachezesha viungo hao nafasi hizo, tofauti na ilivyokuwa mechi zilizopita za ligi kuu.

Wakati mazoezi hayo yanaendelea kwenye Uwanja wa Boko Veterani huko Ununio jijini Dar es Salaam, kocha huyo alionekana akiwapa maelekezo viungo hao jinsi ya kulishambulia goli la wapinzani wao.

Kocha huyo, katika mazoezi yaliyofanyika Alhamisi jioni, alionekana akiwapa maelekezo na mbinu mbalimbali Niyonzima, Coutinho na Mrisho Ngassa jinsi ya kupiga krosi, kona na faulo safi zitakazofika kwa Jaja mwenye umbile kubwa.

Wakiendelea na mazoezi hayo, Maximo alisikika akiwataka wachezaji kupiga pasi za haraka huku wakicheza mipira mirefu kwa kutumia mfumo wa kushambulia kwa kushtukiza ‘Counter Attack’ akiwatumia viungo, Hassani Dilunga na Mbuyu Twite.

“Niyonzima, Coutinho chezeni pasi za harakaharaka katika kushambulia na siyo kukaa na mpira muda mrefu ili msipoozeshe mpira, pia nataka mcheze mipira mirefu mara baada ya kupigiana pasi,” alisikika Maximo kwa sauti kubwa uwanjani hapo.