KIONGOZI SIMBA….KWA KUWA ALIMKOSOA MALINZI, SASA ANAZUIWA KUINGIA UWANJANI

Na Saleh Ally

MCHEZO wa soka hapa nchini sasa unazidi kuingia kwenye njia ambazo si sahihi na hasa suala la uadui na ubabe.

Shirikisho la Soka Tanzania (TFF) ambalo linapaswa kuongoza mchezo wa soka katika njia sahihi, linaonekana kushindwa na sasa ubabe unachukua nafasi kubwa.

Kumekuwa na wadau wengi wa soka ambao wamekuwa wakilalama kutishiwa au kulazimishwa kufungwa midomo wakitakiwa kutozungumza jambo lolote kuhusiana na TFF hasa inapoonekana kuna tatizo katika shirikisho hilo.

Mmoja wao ni Dk Damas Ndumbaro ambaye TFF imefanya kichekesho kwa kumfungia miaka saba, eti kwa kisa cha kuzitetea klabu zilizokuwa zikipinga TFF kuzikata fedha zao za udhamini kutoka Azam TV na Vodacom.

Achana na Dk Ndumbaro, hata serikali kupitia Naibu Waziri wa Habari, Vijana, Utamaduni na Michezo, Juma Nkamia ilipinga jambo hilo ambalo lilionekana si sahihi. Lakini TFF ikalifikisha haraka kwenye kamati ya nidhamu na kumfungia Dk Ndumbaro akiwa nje ya Tanzania.

Kwa kuwa wadau wengi wa soka wamekaa kimya, TFF inataka kutumia mwanya huo wa kuendesha kampeni za kinyama, kunyanyasa watu, kuwafunga midomo kwa nguvu na anayesema anaonekana ni adui. Mfano mzuri ni Fortunatus John Mang’wela ‘Photu’.

Mang’wela ndiye mwenyekiti wa matawi ya Simba katika Wilaya ya Temeke na hivi karibuni alikutana na mkasa wa kuzuiwa kuingia uwanjani kwa madai alizungumza redioni akitaka Rais wa TFF, Jamal Malinzi ajibu hoja za Dk Ndumbaro kuhusiana na ubadhirifu wa fedha za TFF na si kukaa kimya.

“Nimekutana na mkasa huo na ulianza Jumamosi wakati Yanga wanacheza na Mgambo. Nilifika Uwanja wa Taifa nikiwa na Mwenyekiti wa Chama cha Soka Temeke (Tefa). Walinzi wakanizuia kuingia na ilionekana walipangwa.

“Nikawaomba angalau niingie nikamshushe mwenyekiti, wakaniruhusu, nikaingia na ‘eskoti’ hadi ndani, nikamshusha mwenyekiti, halafu nikatolewa nje.

“Kawaida kwa kuwa mimi ni mwenyekiti wa matawi, nina kitambulisho maalum. Nikaona ni bora nikate tiketi, nikalipa shilingi elfu kumi na tano, nikaingia tena uwanjani na safari hii niliona walinzi walivyokuwa wakiniangalia, nikajua kuna jambo.

“Yule (Wilfred) Kidau (Kiongozi wa TFF), ndiye aliongoza zoezi la kunizuia. Nikawa nimefanikiwa nimeangalia mpira. Baadaye nilimfuata na kumuuliza tatizo ni nini, maana ni mtu tunayefahamiana. Wao TFF wamekuwa wakishangazwa na mimi kumsakama Malinzi na uongozi wao wakati mimi ni mtu wao pia kama ndugu yao.

“Nikamueleza, sikuwa na sababu ya kukaa kimya wakati naona kuna tatizo na hata mahojiano yangu katika redio za Clouds, Magic na Times katika siku tofauti ilikuwa ni sehemu ya kuonyesha mimi ni mdau na ninataka maendeleo na wala sina chuki na Malinzi. Baadaye nikaachana na Kidau,” anasema Mang’wela.

“Jumapili mimi niliwahi kufika uwanjani, Simba inapocheza Taifa, mwenyeji wake ninakuwa mimi, maana ndiyo mwenyekiti wa matawi ya Temeke, lakini ajabu nikazuiwa tena. Kwangu niliona sasa TFF imeingia hadi kwenye kuihujumu Simba, vipi mwenyeji ambaye ni mimi nizuiwe?

“Kwa mara nyingine nikaamua kukata tena tiketi, nikaingia kwa shida na kuangalia mechi. Imeisha tu akaja askari mmoja anaitwa Muddy, ana nyota moja. Akaja kunikamata eti nimemtukana Kidau, nikashangazwa sana.

“Sikufanya ubishi, nikasema acha tulipeleke jambo hilo kituoni. Maana ningeanzisha mzozo, mashabiki wa Simba pale ingekuwa shida. Nikatumia busara za kiutu-uzima. Ajabu nataka tuondoke kwenda kituoni, askari akawa analazimisha nikapande Difenda wakati mimi nina gari langu pale.

“Nikamuuliza Muddy, kwa kosa la kumtukana mtu, unataka niache gari langu (Toyota) Prado la shilingi milioni 30 pale uwanjani! Likiibiwa? Nikamsisitiza achukue hata askari kumi wapande kwenye gari langu twende kituoni.

“Ajabu sikufunguliwa mashtaka na askari wengine wenye busara walipokuja pale wakaona ni mambo ya kitoto na kutaka anayeing’ang’ania aachane nalo. Kwanza hakukuwa hata na ushahidi wa mtu kutukanwa, halafu wanaume wanashitakiana eti mtu katukanwa, ajabu sana!”

“Nakuambia mpira wetu unatumbukia pabaya, kama sasa imefikia hata viongozi wakizungumza lolote kuhusiana na TFF basi wanazuiwa kuingia uwanjani au wanaonekana ni maadui!

“Tusipoangalia TFF itakwenda kubaya, watu wataanza kuumizwa au kuingia ambako mpira haukufika. Maana uadui huu utajenga chuki kwa wengine, halafu badala ya furaha na maendeleo, itakuwa ni maumivu.

“Mchezo wa soka haujawahi kuwa hivi hapa nchini, Tanzania si nchi ya watu kuzuia watu wasiwe huru kuzungumza. TFF inataka watu waoga, wasio na uwezo wa kufikiri au kuchangia. Mimi nasimama kidete na nitaendelea kwenda uwanjani ila wadau waamke, tunakokwenda si kuzuri na huu si mpira wetu, maana viongozi wanaonekana kama hawajui wanalofanya na badala ya maendeleo wanatengeneza uadui,” anasema Mang’wela akionyesha kuwa na uchungu kutokana na unyanyasaji aliokumbana nao kutoka kwa Kidau, kiongozi wa TFF ambaye ni swahiba mkubwa wa Malinzi.