SIMBA YATOA DOLA 5,000 KULIPIA MATIBABU YA KIONGERA

Straika majeruhi wa Simba, Patrick Kiongera, anatarajia kuondoka nchini ndani ya wiki moja kwenda India kwa ajili ya matibabu.

Tayari daktari atakayemtibu ameishampangia siku ya kuanza kazi hiyo, baada ya kupunguza kazi zilizokuwa zimembana.

Mmoja wa viongozi wa Kundi la Friends of Simba (FOS), amesema uongozi wa Klabu ya Simba umeandaa dola 5,000 (Sh milioni 8.5) kwa ajili ya matibabu hayo.

“Matibabu pekee ni dola elfu tano, uongozi wa Simba umeandaa kiasi hicho cha fedha kwa ajili ya matibabu.

“Yamebaki mambo machache tu kabla ya Kiongera kuondoka kwa ajili ya matibabu hayo na upasuaji wa goti kwa jumla,” kilieleza chanzo.

Kiongera aliumia katika mechi ya kwanza ya Ligi Kuu Bara baada ya kugongana na kipa Shabani Kado wa Coastal Union.

Simba imekuwa ikipwaya katika safu ya ushambuliaji, hali ambayo imeufanya uongozi uanze kuhaha kupitia kamati ya usajili kwa ajili ya kujiimarisha zaidi.