TAMBWE: NITABEBA KILA KITU CHANGU WAKATI NARUDI BURUNDI

Mshambuliaji nyota wa Simba, Mrundi, Amissi Tambwe, anatarajia kuondoka nchini leo na kwenda kwao Burundi kwa ajili ya mapumziko lakini amepanga kuondoka na mizigo yake yote.

Tambwe ambaye hivi sasa hana raha katika kikosi cha Simba kutokana na kuwepo kwa tetesi za kutaka kuachwa, amefikia hatua hiyo akihofia kukutwa na balaa kama lililomkuta Mrundi mwenzake aliyewahi kuitumikia klabu hiyo msimu uliopita, Gilbert Kaze.

Kaze ambaye alikuwa akicheza nafasi ya beki wa kati katika kikosi cha Simba, alifungashiwa virago bila ya yeye kujua wakati alipokuwa Burundi kwa mapumziko hali inayomfanya naye ahofie kukutwa na balaa hilo.

Tambwe amesema kuwa, mpaka sasa hajui hatma yake katika kikosi cha timu hiyo, hivyo anaenda kwao Burundi akiwa amejiandaa kwa jambo lolote litakalotokea hapo baadaye, ndiyo maana anatarajia kuondoka na mabegi yake yote.

Alisema pamoja na kupewa moyo na viongozi wa timu hiyo, bado ana wasiwasi kwa sababu hajafanya mambo makubwa msimu huu kama ilivyokuwa ule uliopita.

“Jambo jingine linalonipa wasiwasi ni kuhusiana na mkataba wangu, kwani nimebakiza miezi michache tu, hiyo nayo inaweza kuwa sababu lakini ngoja tuone itakavyokuwa.

“Natarajia kuondoka Jumatano (leo), kwenda nyumbani kwa mapumziko lakini itabidi niondoke nikiwa nimejiandaa kwa kila kitu na kama ikitokea nikaachwa basi nisihangaike tena,” alisema Tambwe ambaye msimu uliopita ailiibuka mfungaji bora wa ligi kuu baada ya kufunga mabao 19.