WAWA AFUZU VIPIMO AZAM, SASA AWASUBIRI MABOSI WAAMUE

Beki kisigi Serge Wawa raia wa Ivory Coast amefuzu vipimo vya afya tayari kuichezea Azam FC.

Wawa ambaye anakipiga El Merreikh ya Sudan amefuzu baada ya kufanyiwa vipimo kwenye kliniki ya Ebtu Physical Therapy United ya Mikocheni jijini Dar es Salaam.

Msemaji wa Azam FC, Jaffar Iddi amesema baada ya kufuzu vipimo hivyo, wanasubiri majibu kutoka kwa uongozi wa juu.

“Kuhusu vipimo, Wawa anaonekana yuko safi. Sasa ni suala la uongozi wa juu kuamua. Bodi ya wakurugenzi tunaisubiri na mwisho tutajua kama Wawa atasajili Azam FC au la,” alisema Iddi.

Azam FC imeamua kuimarisha safu yake ya ulinzi huku ikiwa na mabeki visiki watatu ambao ni nahodha Aggrey Morris, Said Morad na David Mwantika.