FEDHA ZA SOKA ZISAIDIE SOKA JAMANI, FEDHA YA MTANI IMESAIDIA NINI?

TANZANIA yetu ni nchi yenye kila kitu, lakini utamaduni wa mambo kadhaa ndiyo umekuwa unachangia kutuangusha na hasa suala la uoga, watu kuhofia kusemwa, kukosolewa na hata kuumizwa!

Jiulize kama ikiwa ni nchi iliyojaza waoga, wasiopenda shida wala karaha, wasiotaka kuulizwa wala kusumbuka na hata kama kitu kinaharibika, basi acha kiharibike tu kuliko kusemwa au kulaumiwa bure!

Lazima nijitenge, lazima niseme ukweli na ninatoa shukurani kwa wote ambao wamekuwa wakiniunga mkono kutokana na suala la fedha za Bonanza la Nani Mtani Jembe, kwamba lengo tujue, mgawo wake ulikuwaje.

Tukijua mgawo uliwaje, basi itakuwa ni lahisi kujua fedha hizo zimekwenda wapi na wapi na zimesaidia vipi mchezo wa soka yetu ambayo ni changa, inaendelea kupigania kupata ahueni.

Kuna mtu msomaji mmoja alijiuliza, kwamba hauoni kama Kampuni ya Bia Tanzania (TBL) kupitia bia yake ya Kilimanjaro inayozidhamini Yanga na Simba ikiona inaandamwa, basi itajitoa na kuwa shida kwa klabu hizo.

Jibu langu: “Simba na Yanga ni kubwa kuliko bia ya Kilimanjaro hapa nyumbani, hata unapozungumzia udhamini, naweza kusema zinapewa fedha kidogo, badala yake zingeongezewa kwa kuwa Kilimanjaro inatapa nafasi pana ya kujitangaza kupitia klabu hizo kongwe.”

Jibu la msomaji: “Kweli naungana na wewe, pia Kilimanjaro si mdhamini wa kwanza, akienda, wako watajitokeza, hizi timu zinauzika kweli.”

Nimekuwa na mijadala mingi na wasomaji wengi kupitia namba yangu ya 0658 939769, wanaungana na mimi, sasa wanaamini TBL imepata faida kubwa kujitangaza. 

Lakini kumbe nao wanashangazwa kama ilivyokuwa kwangu, vipi inachukua mapato ya mlangoni?

Kama TBL haijachukua, nani kachukua, kapeleka wapi, kwa nini na kwa faida ya nani? Lakini pia nataka kujua, mpira umefaidika kwa kiasi gani?

Fedha za soka, lazima zifaidishe mchezo wa soka. Hilo halina mjadala na ningependa kama TBL wangelieza hili suala kuliko kukaa kimya. Najua kama wataendelea kukaa kimya,nitapiga hodi ofisini kwao ili kwenda kupata uhakika wa mambo.

Najua huenda nikapata sapoti ndogo kutoka kwa wanahabari wenzangu kwa hofu kuwa watakosa kitu fulani kama urafiki wao na watu wa TBL. Lakini sasa ni wakati wa kuusaidia mpira wa Tanzania, tuwe wazi bila ya uadui wala hofu hata kidogo.

Bado naendelea kukadiria kwamba ni Sh milioni 500 hadi 580 zinaweza kuwa zilipatikana siku ile katika mechi ya Nani Mtani Jembe 2. Nani aliisimamia, nani alichukua fedha zote hizo na zimeusaidia vipi mpira wetu.

Nilitaka tutajiwe mapato nilipoandika Hoja Yangu, Ijumaa. Hilo bado nalisisitiza, lakini nauliza tena, nani alichukua fedha hizo na ziliufaidishaje mpira wetu kwa kuwa naona si sahihi kama fedha zinatokana mpira zinakwenda kutengeneza tasnia nyingine au matumbo ya watu wachache halafu mpira unaendelea kudidimia.

Vizuri waandaaji wa mechi hiyo wakatuambia, wakafafanua ili mien aye nipunguze maswali mengi kuhusiana na hilo. kama hakutakuwa na majibu, basi nitalazimika kutaka kujua, sidhani kama nitafikia kuhamasisha maandamano.

Swali la msomaji mmoja, lilikuwa hivi: “Saleh Ally, kwani wewe umepata hasara gani, hata wasiposema ni kiasi gani wameingiza wewe unakosa nini?”

Jibu langu: “Ninacho cha kukosa, mimi ni mdau michezo, soka ni moja wapo. Kama fedha zake, zitafaidisha wachache, halafu kila mmoja akakaa kimya eti hakupata hasara yoyote, basi ndiyo mpira wetu unaangamia. Tusiache watu wachukue fedha za soka na kuweka mifukoni mwao wanavyotaka, usisahau Yanga, Simba ni za wananchi kama mimi na wewe na si mali ya viongozi wala TBL. Je, unajua TBL kazi yao ni kuuza bia na si kuandaa mechi na kuchukua mabao?”

Msomaji hakujinibu, huenda alikuwa busy au aliishiwa credit. Nitasubiri jibu lake, lakini wakati hajanijibu, nakumbushia tena. Mgawo wa Nani Mtani Jembe ukoje? Nani na nani kachukua na unafaidishaje soka nchini? Nitarudi.