MIEZI SITA NA TOFAUTI YA MAXIMO NA PLUIJM

Na Saleh Ally

KOCHA Marcio Maximo aliyetupiwa virago vyake Yanga na Hans van der Pluijm ambaye anachukua nafasi, kila mmoja unaweza kumzungumzia ndani ya miezi sita akiwa Jangwani.

Pluijm ndiye alianza kuifundisha timu hiyo kabla ya Maximo, aliingia mkataba wa miezi sita, mwishoni akaona hakuna dalili za kuongeza wakati timu ilikuwa inafanya vziuri, akaondoka zake na kujiunga na Al Shaolah FC ya Saudi Arabia, ambayo hakudumu nayo.

Pluijm anaonekana kuwa na rekodi nzuri na Yanga kwani hakufukuzwa katika miezi hiyo sita, pia uongozi ulijaribu kumrudisha baada ya kuwa ameingia mkataba na Al Shaolah ikashindikana.

Maximo pia alisaini mkataba wa miaka miwili kutokana na rekodi yake akiwa na timu ya taifa, Taifa Stars. Lakini ameutumikia mkataba huo kwa miezi sita tu, sawa na ile ya Pluijm.

Ndani ya kipindi hicho, bila ya kujali huyu alifukuzwa na yule aliondoka, jambo la kutazama hapa ni mambo mbalimbali ya uwanjani na kiuongozi ili kuangalia tofauti za makocha hao, mmoja kutoka Bara la Amerika Kusini, mwingine Ulaya.

Uoga:

Hakuna kocha asiye muoga kufungwa, lakini Maximo imezidi na hili lilianza kujionyesha zaidi wakati alipokuwa katika kikosi cha Taifa Stars.

Lakini alipokuja Yanga, hali hiyo ilijionyesha mapema. 

Alikataa katakata kucheza mechi za kirafiki ikiwemo ile dhidi ya Azam FC na baadaye Mtibwa Sugar.

Kiasi fulani, mambo ya Maximo yanachanganyika na siasa, kwa kuwa ni mtu wa maneno mengi na ikiwezekana kama ataharibu, kamwe huwa hakubali.

Misimamo:

Wote ni makocha wenye msimamo, wasumbufu kwa waandishi wa habari. Hawatoi nafasi kubwa ya kueleza mambo mengi wanayofanya kama ambavyo mafunzo mengi ya kisasa ya makocha yanavyoagiza kushirikiana na vyombo vya habari kwa ukaribu zaidi.

Maximo alijipangia kuzungumza kila Ijumaa, hata hivyo mara kadhaa amekuwa akichagua sana kuzungumzia mambo fulani na mengine kuyaacha.

Pluijm kwenye kuzungumza ni uwazi kwa kiasi kikubwa. Si mtu anayetaka kubania maneno, lakini kumpata azungumze pia ni kazi lakini akiamua kuzungumza, anaeleza kila kinachotakiwa kujibiwa.

Timu:

Timu ya Maximo inakuwa na mchanganyiko, vijana na wakongwe. Lakini wakati anaanza ni muoga kubadili kikosi chake, wengi ambao anawakuta huendelea kuwatumia na baadaye anaanza kutoa nafasi.

Alitoa nafasi kwa kina Jerry Tegete na Kiggi Makasi akiwa Taifa Stars. Lakini Yanga ni Hamis Thabiti pekee alimrudisha na hakucheza zaidi ya mechi tano katika kipindi chote cha miezi sita aliyokaa.

Si lahisi kutoa nafasi kwa wachezaji walio nje ya kikosi kilichozoeleka na wakati mwingine ni mtu anayejikinga sana na lawama, hivyo huhakikisha anajaza nyota wote ili kujiondoa kwenye kulaumiwa.

Mholanzi Pluijim si muoga, anapenda kujaribu na anapenda kutoa nafasi kwa wachezaji wengi zaidi. Utaona katika mechi za majaribio anaweza kubadili kikosi mara kadhaa kama alivyofanya wakati alipoifundisha Yanga kwa miezi sita kabla ya kuondoka kwenda Al Shaolah FC.

Kasi:

Kikosi cha Maximo kinajaza watu wengi zaidi nyuma. Kawaida mabeki wanne hubaki kabisa nyuma na mabeki wa pembeni huenda upande mmoja au kubaki wote kabisa. Mfano Oscar Joshua na Juma Abdul, walipiga krosi chache zaidi wakati wa kipindi cha miezi sita cha Mbrazil huyo.

Inawezekana Pluijm akamfuatia Ernie Brandts ambaye alitaka vijana wake wapande zaidi kutokea pembeni na kupiga krosi nyingi zaidi.

Lakini ukimlinganidha Brandts na Maximo, utaona Mholanzi huyo kikosi chake kinacheza kwa kasi zaidi kwa kuwa anataka timu ‘inayotembea’. Pluijm amekuwa akisisitiza timu yenye kasi kwa maana ya kuwachosha na kuwachanganya wapinzani wao.

Mazoezi:

Katika mazoezi, mwanzoni hakukuwa na tofauti kubwa sana. Lakini ufundishaji wa Maximo ulionekana una ulaini kidogo kwa maana ya ‘loading’, yaani mzigo mkubwa. Unapoanza mazoezi ya kujiandaa na msimu mpya. Basi yatanakiwa mazoezi magumu sana.

Angalia tofauti yao hapa, Maximo anaamini zaidi makocha kutoka nchini kwake Brazil, ndiyo maana alisisitiza kuja na Leonardo Neiva. Lakini Pluijm kwa kuwa ni mkazi wa bara la Afrika, anajua nini cha kufanya katika timu za Kiafrika.

Alisisitiza kuwa na msaidizi kutoka Brazil, lakini msisitizo wa Pluijm ni kuwa na msaidizi wa hapa Tanzania na anayemvutia zaidi ni Charles Boniface Mkwasa na ndiye anajua mazingira ya wachezaji wa Kibongo.

Hivyo anapofanya maandalizi ya mwanzoni mwa msimu, anajua dozi ya kuwapa wachezaji ili wawe fiti. Kocha wa Express ya Uganda aliwataja wachezaji wa Yanga kutokuwa na stamina ya kutosha wakati walipowafunga katika mechi ya kirafiki.

Lakini kwa Pluijm, utaona Yanga inabadilika, timu yenye kasi na nguvu na wachezaji wanajua shuruba ya mazoezi ya mwanzo ingawa kwa sasa, hakutakuwa na mazoezi makali sana labda kujaziajazia maana mechi za ligi, ziko karibu.

Upendeleo:

Maximo alikuwa hawaamini zaidi makocha wa Kitanzania. Hata alipokubaliana na Yanga kuja nchini, uongozi ulimsisitiza tayari una kocha msaidizi ambaye ni Mkwasa, yeye akakataa katakata.

Kwa nini? kumbuka hata akiwa Stars alisisitiza kuja na Itamar Amorim. Hadi alipoondoka kwenda Azam FC, yeye ndiyo akaanza kuonyesha imani kwa Ali Bushiri. 

Lakini Pluijm ni tofauti, si kwa kuwa tu ameoa mwanamke raia wa Ghana, hivyo anaweza kuwa ‘shemeji’ wa Afrika, lakini anawaamini makocha wa Kiafrika na hata akiwa Ghana, alikuwa na wasaidizi kutokea nchi husika na si kwao Ulaya.