HADITHI YA SIMBA, YANGA NA VIWANJA VYA KUANZIMA ITAISHA LINI?

Na Saleh Ally

GUMZO la ujenzi wa viwanja kwa klabu mbili kongwe la Yanga na Simba, sasa linaonekana ni kama hadithi isiyokuwa na jipya, imezoeleka.

Hadithi ileile, kuanzia aliyepita, aliyepo, huenda hata tunayemtarajia, huenda akaingia na kuzungumza yaleyale.

Big G ukiitafuna sana, kawaida inaisha utamu. Lakini inavyoonekana si hii inayozihusu Simba na Yanga, ni tamu tu kila kukicha.

Yanga na Simba, wangekuwa wawekezaji, basi ungewaita ni wale wasio na uwezo wa kujenga kiwanda licha ya kuwa na maeneo yao.

Jiulize, Yanga na Simba, kweli kwa historia yao, sehemu walizopita, ukubwa wao. Wanashindwa kujenga hata uwanja wa mazoezi?

Yanga na Simba ndiyo timu zinazoongoza kwa kuhangaika kwa uwanja wa kufanyia mazoezi kuliko timu nyingine yoyote nchini!

Najua utabisha, hauna haja ya kuzifananisha na Azam FC yenye uwanja wake au Stand United, yenye uhakika wa kujifua Kambarage. Mfano mzuri ni Ajabalo FC ‘Mnyama Mkubwa’ ya Sinza.

Ingawa inatumia Uwanja wa Shule ya Msingi Mashujaa, ukiuliza kila mtu eneo hilo atakueleza ni uwanja wa Abajalo, hata kama haiumiliki.

Nikikuuliza leo, Yanga au Simba, uwanja wao wa nyumbani ni upi? Naamini utakuwa hauna jibu.

Hata kama Yanga na Simba, zote ni Sports Club, yaani zinazoshirikisha michezo mbalimbali si soka tu. Vipi hazina viwanja vilivyo tayari kutumika angalau kwa ajili ya mazoezi tu?

Kuna hoja nataka niiweke mezani, tujaribu kuijadili na kuangalia mwendo au kipimo cha safu mbili za uongozi za klabu hizo zinazoongozwa na Yusuf Manji na Evans Aveva kama kweli wako makini na wanataka mabadiliko hasa katia suala la uwanja.

Yanga au Simba, zinapofanya mazoezi kwenye Uwanja wa Boko Veterani, zinalipa Sh 300,000 kwa wakati mmoja. Labda asubuhi, zikifanya mara mbili kwa siku, ni Sh 600,000.

Yanga inalipa Sh 100,000 kila siku kwenye Uwanja wa Shule ya Sekondary ya Loyola ya Mabibo jijini Dar es Salaam.

Kwa mazoezi pekee, kwa mwaka Yanga na Simba zinaweza kutumia hadi Sh milioni 27 kwa timu moja. Piga hesabu ya miezi mitatu tu!

Hadi Boko Veterani, imeweza kutengeneza uwanja. Hii ni timu ya watu wanaotaka kujifurahisha tu! Vipi taasisi kubwa kama Simba na Yanga ambazo mpira ndiyo biashara namba moja?

Yanga inakwenda kwenye michuano ya Shirikisho, imepangiwa kukipiga na BDF. Huenda ikawa ndiyo timu pekee ambayo haina hata uwanja wa mazoezi?

Ni kichekesho na maajabu. Inaonekana ni kawaida kwa kuwa imezoeleka, lakini ukiiangalia kwa kina ni kitu kinachotia aibu, kinyaa na hakifai kuendelea kujadiliwa bila vitendo.

Yanga walishaonyesha ramani na thamani ya uwanja wao inajulikana. Simba wamesema wameishapata ramani. Sasa hiyo ya michoro inatosha, vizuri tuanze kuona tingatinga likianza kazi.

Kutokuwa na uwanja wa uhakika, unazifanya Simba na Yanga kutokuwa na programu za uhakika. Mfano Yanga haiwezi kutumia uwanja wa Loyola kwa jioni. Viwanja vyenye wenyewe, wakati fulani wanakuwa na ratiba zao.

Shule za Msingi, Shule za Sekondary zinamiliki viwanja. Klabu kongwe ambazo kazi tao ni soka, hazina viwanja!

Ajabu zaidi, kila upande una eneo angalau la kujenga ‘pitch’ tu. Nani kajaribu angalau kuanza? Imefikia kwa wachezaji wa kigeni, kuwasajili, kuwaacha, kuwalipa fidia. Yanga na Simba zingekuwa zimekamilisha uwanja kwa msimu mmoha tu.

Hii ni sehemu ya kuonyesha asilimia kubwa ya vingozi wanaioingia kuongoza Yanga na Simba ni waoga, wanachojaribu ni kupata ushindi ambao ni wamuda. 

Bora Yanga kumfunga Simba au Simba kushinda dhidi ya mtani, yaani mambo ya muda. Lakini uwanja ni mipango endelevu. Sasa mbona hawafanyi?

Wakati mwafaka wa viongozi kuona aibu. Kwa kuwa hawana sababu ya eneo, badala yake ni suala la ujenzi tu. Jengeni basi acheni blah blah, hamchoki kuulizwa!