MAXIMO ATOA UFAFANUZI WA KUTOMCHEZESHA EMERSON DHIDI YA EXPRESS

Kiungo mpya mkabaji wa Yanga, Mbrazili, Emerson Roque, Jumamosi alikuwa jukwaani akishuhudia timu yake ikipepetana na Waganda, Express FC, katika mchezo wa kirafiki, jambo ambalo mashabiki wa Yanga walipinga kutomjumuisha kikosini.

Hata hivyo, Kocha wa Yanga, Marcio Maximo, ameibuka na kutaja sababu ya kumuondoa kikosini katika mchezo huo kuwa bado amechoka kwani alitumika sana katika ligi kuu ya nchini Brazili alikotokea kwenye Klabu ya Bonscusessco inayoshiriki Ligi Daraja la Pili, lakini akaongeza kuwa mchezo wa Jumamosi dhidi ya Simba atakuwemo.

Maximo amewaondoa wasiwasi mashabiki ambao wanadhani nyota huyo pengine anaumwa.

“Sikuweza kumtumia Emerson juzi, kwa kuwa bado ana uchovu wa ligi, alihitaji kupumzika zaidi maana Ligi ya Brazil imemalizika hivi karibuni na alikuwa akicheza mechi nyingi, kwa hiyo niliona ni vema nikampa muda mrefu wa kupumzika kabla ya kuanza majukumu makubwa kwenye mechi dhidi ya Simba,” alisema Maximo.

Roque ambaye anafananishwa na Yaya Toure wa Manchester City, kutokana na uwezo wa kukaba na kufunga,  mtihani wake wa kwanza ni kuwasimamisha viungo machachari wa Simba, Emmanuel Okwi na Shaban Kisiga hapo Jumamosi.