STORI YA BIN SLUM COASTAL UNION NA AFRICAN SPORTS INAKUHUSU

Na Saleh Ally

BAADA ya African Sports kupata uhakika wa kurejea Ligi Kuu Bara, haraka nilipiga hodi kwenye ofisi za Bin Slum Tyres Ltd, nikitaka kujua mikakati hasa ya uongozi wa wadhamini hao.

Nilitaka kujua wadhamini hao watafanya nini baada ya kufanikiwa kuipandisha African Sports ‘Wana Kimanumanu’, moja ya timu kongwe kabisa katika soka nchini.

Kurejea kwa African Sports katika Ligi Kuu Bara, maana yake Mkoa wa Tanga unakuwa na timu tatu, nyingine ni Coastal Union na Mgambo FC.

Lengo la kuwahi kuzungumza na uongozi wa Bin Slum ilikuwa ni kutaka kujua baada ya kuipandisha African Sports sasa wanafanya nini kuhakikisha wakiingia ligi kuu, basi wanakuwa sawa kweli.

Majibu ya Mkurugenzi Mtendaji Mkuu wa Bin Slum, Nassor bin Slum, yalinishtua baada ya kusema ameiacha African Sports iendelee na mambo yake.

Bin Slum alisema haya: “Kweli nikueleze kidogo tunaweza kuwa na mtazamo utakaowashtua wengi. African Sports tumekuwa nao bega kwa bega tangu madaraja ya chini, sasa wapo Ligi Kuu Bara.

“Mdogo wangu (Mohammed) ambaye ni mmoja wa wakurugenzi ndiye alikuwa akihusika na udhamini wa African Sports kwa kuwa yeye ni mwanachama huko. Mimi ni Coastal Union.

“Ila tulichoamua ni kuwaacha African Sports wapate wasaa wa kuingiza fedha sasa. Unajua hatukuwa tukifanya vile (kuwasaidia) kwa lengo la kufanya biashara.

“Sisi wote kwetu ni Tanga, leo kama kampuni tumeonyesha upendo wetu kwa Coastal Union na baadaye African Sports. Sasa timu zote kongwe zimerudi ligi kuu.

“Tunawaachia African Sports vifua vyao (upande wa mbele wa jezi), ili wapate wadhamini ambao wataweza kuwekeza na kutoa fedha.

“Unajua wakati Coastal ikiwa inapigania kupanda daraja, hakuna aliyesema lolote zaidi ya kutuachia tupambane.

“Lakini ilipopanda, maneno yakaanza na ajabu wengi wanaodai wanaipenda timu wakajitokeza na kuanza kulaumu. Sasa hatutaki hilo lijirudie tena kwa African Sports halafu tuingie kwenye malumbano.

“Kama ni upendo wetu wa kutafuta na tulichopata tumekirudisha mkoani kwetu kwa kupambana kuhakikisha soka linarejea na kuzirudisha timu zote kongwe, tunaona ni jambo jema kabisa na vema tuishie hapo,” anasema Bin Slum.

 Umeyasikia maneno ya bosi mkubwa wa Bin Slum? Huenda ingekuwa jambo zuri kama angeendelea, lakini hofu ya kugeukwa na watu kutokuwa waungwana inamuondoa.

Pamoja na yote, bado hauwezi kuipongeza familia ya Bin Slum kutokana na ilivyoweza kujitolea kwa mkoa ambao imetokea. Kweli wapo kwa ajili ya kuchuma katika Jiji la Dar es Salaam.

Kwetu sote, mimi wewe na wengine, tunaisaidia mikoa yetu kuinuka kimichezo? Kila mmoja anapaswa kujitathmini kupitia mtihani huo wa Bin Slum.

Leo wamechangia kuifanya Tanga kufikisha timu tatu, heshima ya kisoka katika mkoa huo sasa imerejea na wana timu zinazotoa ushindani sahihi.

Wangapi wanatokea Rukwa, Kigoma, Kilimanjaro, Dodoma, Tabora na kwingineko ambako mikoa yao imedorora kisoka na haina hata timu?

Si kila mkoa lazima utakuwa na timu, lakini bado msaada kwa soka hata kupitia vijana bado unaweza kuwa sehemu ya kuonyesha mnaijali mikoa mliyozaliwa, mikoa yenu ya asili.

Unaweza kujitangaza Dar es Salaam na Tanzania nzima huku ukiusaidia Mkoa wa Mwanza, Shinyanga au Tabora.

Kampuni ya Bin Slum Tyres Ltd imeonyesha uzalendo wa hali ya juu kwa Mkoa wa Tanga. Lakini uzalendo wake upo juu hata katika mikoa mingine na hii inaonyesha ni biashara yenye upendo ndani yake, hivyo wengi wanapaswa kuiga na inawezekana, kikubwa kuamua na kuondoa hofu.

Watanzania pekee kupitia wadau na kampuni kama hiyo ya Bin Slum Tyres Ltd, ndiyo wanaoweza kuubeba mpira wa Tanzania. Tukisubiri watu watoke nje ya mipaka yetu, tutajidanganya.