UBINGWA SASA NI VITA YA WENYE NAZO ENGLAND

Na Saleh Ally

BAADA ya sare ya bao 1-1 juzi kwenye Uwanja wa Stamford Bridge jijini London, sasa Chelsea na Manchester City hakuna mbabe zaidi ya mwenzake zinapokutana.

Kwani hiyo ni mechi ya pili ya Ligi Kuu England msimu wa 2014-15 zinakutana na inaonekana hakuna mbabe zaidi ya mwingine lakini hilo linaweza kupata majibu katika mbio za ubingwa.

Chelsea wapo kileleni wakiwa na pointi 53 na Man City wanaoigombea nafasi hiyo kwa nguvu zote, wako katika nafasi ya pili wakiwa na pointi 48.

Kwa haraka kuna mambo mawili, kwanza unaweza kuona kama ni mbali sana hadi ubingwa utakapopatikana kwa kuwa timu zote zimebakiza mechi 15 za mzunguko wa pili.

 Pili, kila timu inajua ugumu wake kwa kuwa katika hesabu za mechi 15 zilizobaki, kuna mabonde ya kila aina kwa kuwa kila timu inapiga hesabu namna ya ushindi dhidi ya timu kadhaa.

Chelsea na Man City si kwamba hadi sasa zina uhakika wa asilimia mia kutwaa ubingwa kwa kuwa timu zilizo katika nafasi ya tatu na nne kama Manchester United, Southampton na hata Arsenal zinaweza kufanya lolote kwa kuwa soka, mambo yake hayaeleweki.

Lakini ukienda kwa hali inavyojionyesha kwa sasa, hakuna ubishi timu hizo mbili za majiji ya London na Manchester ndizo zenye nafasi kubwa ya kuwa na ubingwa, aidha Chelsea wauchukue au Man City waubakize.

Mechi 15:

Katika mechi 15 zilizobaki kwa kila timu, ndani yake kuna kila aina ya burudani kutokana na wanakutana na timu gani.

 Timu kubwa tatu za Arsenal, Man United, Southampton, Liverpool, Tottenham na Everton ndizo zitakuwa kizingiti kikubwa kwa timu hizo.

Karibu kila timu itakutana na asilimia 90 ya timu hizo na hapo kutakuwa na mtihani mzito kwa kuwa “big match” mara nyingi inakuwa haina mwenyewe.

Haitabiriki:

Pamoja na presha kwa makocha Manuel Pellegrini wa Man City na Jose Mourinho wa Man City, inaweza kuwa katika mechi zinazohusisha timu kubwa kama Arsenal, Liverpool na nyingine, lakini wanajua ugumu wa Premier League kwani hata timu zinazoonekana ndogo kama Crystal Palace, West Brom au West Ham zinaweza kutibua mambo na kubadili uelekeo.

Hivyo watakuwa na presha kila dakika za kila mechi hadi ligi itakapofikia ukingoni na mwishowe tamati.

Nyumbani & ugenini:

Hii ni presha nyingine kwa kila timu kati ya hizi mbili. Kila moja inaangalia uchezaji wa nyumbani na ugenini. Kuna msemo kuwa mpira wa sasa hauna nyumbani wala ugenini.

Lakini ukweli unabaki palepale kuwa nyumbani ni nyumbani tu, hilo halikwepeki ingawa usipokuwa makini, inawezekana faida isiwe kubwa pia.

 Katika mechi 15, Chelsea ina mechi tisa za nyumbani ambazo ni nyingi zaidi na sita za ugenini wakati Man City itabaki nyumbani mara nane na ugenini mechi saba.

Ingawa Chelsea ina mechi nyingi zaidi za nyumbani, lakini takwimu zinaonyesha kila timu itacheza mara nyingi nyumbani kabla ya kutoka ugenini.

Je, mechi za nyumbani zinaweza kuisaidia zaidi Chelsea? Kama watakuwa makini na kuhakikisha hawapotezi hata pointi moja Stamford Bridge, basi watakuwa na nafasi nzuri ya kuendelea kubaki kileleni lakini wakiteleza, City ingawa wana mechi pungufu za nyumbani, wanaweza kufanya vizuri zaidi yao.

 Chelsea na Man City hazina mashabiki wengi kama ilivyo kwa Liverpool na Man United. Lakini ndiyo timu zilizoshikilia soka la England kwa msimu huu.

Sasa hata kama mambo yatabadilika, lakini wakongwe hao wanaonekana kazi yao kubwa ni kuwatibulia kuwa mabingwa au kugombea nafasi nne za juu ili waweze kushiriki Ligi ya Mabingwa Ulaya.

Vita hiyo ya Chelsea na Man City si ndogo, inaanzia kwa wamiliki wa timu, mamilionea wa Kiarabu na Kirusi. Pia makocha maarufu, lakini vikosi vilivyoshiba mamilioni ya pauni. Nani atashinda mwishoni? Fuatilia kimyakimya.

CHELSEA

Februari 7, 2015

Aston Villa v Chelsea

Februari 11, 2015

Chelsea v Everton

Februari 21, 2015

Chelsea v Burnley

Februari 28, 2015

Leicester City v Chelsea

Machi 1, 2015

Chelsea v Tottenham

Machi 4, 2015

West Ham v Chelsea

Machi 15, 2015

Chelsea v Southampton

Machi 22, 2015

Hull City v Chelsea

Aprili 4, 2015

Chelsea v Stoke City

Aprili 11, 2015

QPR v Chelsea

Aprili 18, 2015

Chelsea v Man United

Aprili 25, 2015

Arsenal v Chelsea

Mei 2, 2015

Chelsea v Crystal Palace

 Mei 9, 2015

Chelsea v Liverpool

 Mei 16, 2015

West Brom v Chelsea

Mei 24, 2015

Chelsea v Sunderland

MANCHESTER CITY

Februari 7, 2015

Man City v Hull City

Februari 11, 2015

Stoke v Man City

Februari 21, 2015

Man City v Newcastle

 Machi 1, 2015

Liverpool v Man City

Machi 4, 2015

Man City v Leicester

Machi 14, 2015

Burnley v Man City

Machi 21, 2015

Man City v West Brom

Aprili 4, 2015

Crystal Palace v Man City

Aprili 11, 2015

Man Utd v Man City

Aprili 18, 2015

Man City v West Ham

Aprili 25, 2015

Man City v Aston Villa

Mei 2, 2015

Tottenham v Man City

 Mei 9, 2015

Man City v QPR

Mei 16, 2015

Swansea v Man City

Mei 24, 2015

Man City v Southampton

CHELSEA

MECHI

Nyumbani-9

Ugenini-6

MAN CITY

MECHI

Nyumbani-8

Ugenini-7