AZAM YAIKATA MAINI SIMBA, YAMBAKIZA SAID MORAD KUNDINI

Katika harakati za kuhakikisha kuwa wanaendelea kuwa na timu ya mapambano msimu ujao, imebainika kuwa Azam FC wamemjaza manoti ya Sh milioni 20 taslimu beki wao shupavu, Said Morad kwa ajili ya kumbakiza kundini.

Mpaka sasa Azam imefanikiwa kuwaongezea mikataba wachezaji wake wanne, akiwemo Mrundi, Didier Kavumbagu, wazawa Erasto Nyoni, Gaudence Mwaikimba na Morad. 

Kavumbagu aliyeifungia mabao 10 msimu huu pamoja na Erasto na Morad, wamepewa mkataba wa mwaka mmoja kila mmoja huku mkongwe Mwaikimba akichukua wa miezi sita.

Chanzo kutoka ndani ya Azam, kimeeleza kuwa pamoja na fedha hizo, beki huyo ameongezewa mshahara ambao utakuwa mnono.

“Viongozi wanaendelea na mipango ya usajili lakini ndiyo hivyo, kwanza wamewatuliza hawa wengine mapema, Morad pia alikuwa anadhaniwa anaweza kuwahiwa na timu nyingine baada ya kumaliza mkataba wake, ndiyo maana wakamuwahi na kumpa milioni 20 na mshahara wake wa milioni mbili aliokuwa anachukua hata msimu uliopita,” kilisema chanzo hicho.

Alipotafutwa Morad kuthibitisha taarifa alisema kwa kifupi: “Yaani usajili wangu huu hauna mabadiliko makubwa sana, siwezi kuweka wazi sana lakini vingi ni vilevile kama ilivyokuwa msimu uliopita.”