KIGGI, MTIRO WAENDELEA KUKOMAA NA LIGI KUU BARA

KIGGI

Wachezaji wa zamani wa Yanga, Abubakar Mtiro na Kiggi Makassy, wamemaliza mikataba katika klabu zao za Kagera Sugar na Ndanda FC lakini bado wana hamu ya kucheza Ligi Kuu Bara msimu ujao.

Msimu uliopita, Mtiro alimudu kucheza vizuri beki ya kushoto katika kikosi cha Kagera kiasi cha kuitwa Taifa Stars, lakini Kiggi pia aliisaidia Ndanda kubaki ligi kuu baada ya kujiunga nayo Desemba, mwaka jana.

Kidogo Mtiro anaonekana umri umemtupa kwani ana miaka 32, tofauti na Kiggi mwenye miaka 23, wote wamesema wapo huru na wangependa kujiunga na klabu yoyote itakayowataka.

“Mkataba wangu tayari umeisha, najiona bado nina nguvu za kuendelea kucheza, hivyo kama kuna timu inanihitaji nipo tayari kujiunga nayo lakini hata Kagera naweza kuendelea nayo pia,” alisema Mtiro.

Kwa upande wake, Kiggi aliyewahi pia kuitumikia Simba, alisema: “Mimi nimeshamalizana na Ndanda na hapa sasa natazama ustaarabu mwingine kwa timu nyingine ya ligi kuu, ila naweza pia kubaki Ndanda.”