SIMBA WAANZA HARAKATI ZA KUMNASA MSHAMBULIAJI RAIA WA BURUNDI

MAVUGO (KUSHOTO) AKIWA KAZINI NCHINI RWANDA...

Wakongwe Simba wana tatizo katika safu yake ya ushambuliaji. Sasa wameanza harakati za kusajili straika wa maana ili aifungie mabao msimu ujao na sasa ipo katika mazungumzo na mshambuliaji wa Kiyovu SC ya Rwanda, Laudit Mavugo raia wa Burundi.

Kocha wa Simba, Goran Kopunovic ndiye aliyepeleka jina la Mavugo kwa Kamati ya Usajili ya timu hiyo ili asajiliwe baada ya Dan Sserunkuma kuondoka kikosini.

Mmoja wa mabosi wa kamati ya usajili amesema , Mavugo anaelezwa kuwa na uwezo unaofanana na Amissi Tambwe wa Yanga ambaye pia ni raia wa Burundi kama yeye.

Alisema tayari Kopunonic ambaye hatma yake ipo shakani Simba, ameshawasiliana mara kadhaa na Mavugo mwenye umri wa miaka 25 ili aje kumaliza tatizo la ufungaji mabao klabuni hapo.

 “Kuna straika alianza mazungumzo na uongozi baada ya Kopunovic kuweka wazi sifa zake, anatokea Burundi na aliwahi kufanya kazi katika timu ya Polisi ya Rwanda,” alisema.

Mavugo aliyewahi kuichezea Vital’O ya Burundi alilazimika kuondoka Polisi ya Rwanda baada ya kuibuka kwa sheria mpya ya kupunguza idadi ya wachezaji wageni. Hata hivyo kusajiliwa kwake Simba kutategemea na uwepo wa Kopunovic kikosini.