UNAJUA KISA CHA MASAU BWIRE KUZICHUKIA SIMBA NA YANGA? ANASEMA NI KIPIGO KUTOKA KWA KAKA NA MWALIMU WAKE…

MASAU AKIWA OFISINI KWAKE KATIKA SHULE YA MSINGI YA MAKUMBUSHO JIJINI DAR ES SALAAM.

Na Saleh Ally

UKIKUTANA na Masau Kuliga Bwire, kamwe hauwezi kujisikia mchovu au mpweke. Ni mcheshi, mtu mwenye stori nyingi.

Masau Bwire ambaye sasa inawezekana ndiye msemaji maarufu zaidi katika tasnia ya michezo nchini ni mwalimu wa Shule ya Msingi Makumbusho jijini Dar es Salaam.

Mwalimu huyo ambaye ni rafiki mkubwa wa wanafunzi shuleni hapo kama ilivyo kwa walimu wengine, amezungumza na Championi Ijumaa na kueleza jambo ambalo hajawahi kuliweka hadharani.

Ruvu Shooting imeporomoka hadi Ligi Daraja la Kwanza. Masau amesisitiza kwamba hatahama kamwe na hiyo ndiyo timu yake hata ikishuka hadi daraja la nane (kama lipo), lakini yeye ni shabiki wa timu gani?

Kwa mfumo wa ushabiki wa soka nchini, inajulikana kama mtu si Yanga basi atakuwa Simba ingawa wako wachache wamekuwa wakiendelea kusisitiza kwamba wao si mashabiki wa klabu hizo kongwe zaidi nchini zilizoanzishwa mwaka 1935 na 1936.

 

MASAU AKIWA NA BOSI WAKE, MWALIMU MKUU WA SHULE YA MSINGI YA MAKUMBUSHO, BENEDICTOR LYIMO.

Masau anasema licha ya watu kuamini yeye ni Simba damu, wamekuwa wakifanya makosa makubwa kwa kuwa kuna kitu kuhusu yeye hawakuwahi kukijua.

“Kwanza wanapaswa kujua mimi nimewahi kuwa shabiki wa Simba, halafu nikawa shabiki wa Yanga. Nimewahi kuwa shabiki wa timu zote mbili.

“Baadaye nikaamua kuachana nazo zote. Hadi sasa mimi si shabiki wa Simba wala Yanga, watu hawaamini hilo lakini ndiyo hali halisi,” anasema Masau.

Kama yeye si shabiki wa Simba au Yanga ambazo aliwahi kuzishabikia! Je, ilikuwaje akazishabikia halafu akazitosa zote?

Simba:

“Nikiwa mdogo, kaka yangu ambaye sasa ni askari pale Kibaha alikuwa anapenda sana Simba. Akaondoka nyumbani kwenda shule kwa muda mrefu.

“Aliporudi nyumbani akaja na picha kubwa za wachezaji mbalimbali wa Simba na kuzibandika chumbani. Mimi pia nilikuwa nikipenda Simba kwa ajili yake, sasa mambo ya kitoto si nikazitoboa zile picha machoni mwa wachezaji kwa kalamu.

“Aisee, jamaa alinikimbiza bila kuchoka karibu kijiji kizima. Kila nikigeuka, yupo, naongeza mbio. Nikigeuka tena huyu, aah! Akanikamata, alinipiga vibaya. Kuanzia siku hiyo nikaanza kuichukia Simba, nikaachana nayo na kuhamia Yanga,” anasema.

Kama aliondoka Simba, kipi kilisababisha ahamie Yanga ambayo hakuwa akiishabikia?

Yanga:

“Kawaida pale kijijini tulikuwa tukicheza soka tena mechi kali kati ya Yanga dhidi ya Simba. Mimi nilikuwa staa wa soka katika kijiji chetu, lakini ni ule mpira wa makaratasi ‘chandimu’.

“Kwa kuwa nilikuwa sichezei tena Simba, basi nikatua Yanga na ndiyo ikawa timu yangu. Nikawa nawasumbua sana Simba, nakumbuka kipindi kile nilikuwa najulikana kwa jina la utani la Amasha.

“Siku moja, nilitakiwa kwenda shule lakini kwa kuwa tulikuwa na mechi, pia ni tegemeo. Sikukubali kuwaangusha Yanga. Nikatoroka na kwenda kucheza, kumbe mwalimu alishitukia ile hali.

“Basi nilipofika shule, aisee alinikamata na kunichapa sana kwa uzembe ule. Hasira zikanishika, nikaona Yanga ndiyo imeniponza, aaah! Nikaachana nayo pia,” anasema Masau na kusisitiza.

“Kuanzia wakati ule sijawahi kuzishangilia na badala yake nimebaki kama mwanamichezo hadi nilipotua Ruvu Shooting.

SOURCE: CHAMPIONI