MGOSI AKUBALI KUIACHA JEZI YA SINGANO, ACHUKUA ALIYOACHA TAMBWE

Mshambuliaji mkongwe aliyejiunga na Simba, Mussa Mgosi anapenda kuvaa jezi namba 11 katika timu yoyote anayojiunga nayo, hata hivyo sasa hana jinsi kwani na kusema kuwa angependelea sana kupewa  namba 17 ambayo ilikuwa ya Amissi Tambwe aliyetimkia Yanga.

Mgosi amesajiliwa na Simba baada ya kumaliza mkataba wake na Mtibwa Sugar na tayari ameanza mazoezi na timu yake mpya.

Mgosi ambaye anarejea Simba baada ya kuitumikia miaka ya hivi karibuni, alisema huwa anapenda kuvaa jezi namba 11 lakini sasa ina mtu (Ramadhan Singano ‘Messi’) hivyo angependa apewe ya Tambwe, ikishindikana zaidi akabidhiwe namba 10, iliyokuwa na Shabaan Kisiga ‘Marlone’.

“Siku zote huwa navaa jezi namba 11, hata Mtibwa nilikuwa navaa jezi hiyo lakini nimekuja Simba nimekuta hiyo jezi anavaa Messi na haitakuwa vizuri kumnyang’anya.

“Badala yake nitavaa namba 17, ikishindikana kabisa nitava 10 kwani ndilo chaguo langu la pili baada ya namba 11, lakini haya yote yatategemea na uwepo wa hiyo namba kwani nimekuja Simba zaidi kucheza mpira siyo kuchagua namba ya jezi,” alisema Mgosi.

Jezi namba 11 kwa sasa inavaliwa na Messi ambaye yupo katika matatizo ya mkataba wa usajili na Simba lakini namba 17 iliachwa na Amissi Tambwe ambaye alijiunga na Yanga Desemba mwaka jana.

Mgosi ameanza mazoezi ya gym na Simba jijini Dar es Salaam kujiandaa na msimu ujao wa Ligi Kuu Bara utakaoanza baadaye mwaka huu.

Kwa upande wa beki Haji Nuhu amesema angependa kupewa namba 38, kiungo Peter Mwalyianzi anasema yake ni namba 3 (inavaliwa na William Lucian ‘Gallas’) kwa kile alichosema ni kukubali soka la Haruna Moshi ‘Boban’ huku Mohammed Fakhi akisema yake namba 26 tayari inatumiwa na nahodha Hassan Isihaka, hivyo atachukuwa yoyote.