YANGA VS AZAM KAGAME; INAWEZEKANA MASHABIKI WA SIMBA WAKAWEKA REKODI KUWAZOMEA WANAOCHEZA NA YANGA?

Na Saleh Ally

Robo fainali ya Kombe la Kagame itakayopigwa Jumatano ndiyo itakuwa tamu kuliko zote msimu huu.

Inazikutanisha timu mbili za Tanzania, Yanga dhidi ya Azam FC.

Mechi hiyo, hata kabla haijachezwa, tayari imezaa lundo la burudani ambazo zina maswali mengi.

Kwanza kabisa ni Tanzania kuwa na uhakika wa timu itakayotinga nusu fainali, yaani timu nne za mwisho.

Ikiwa Azam au Yanga, moja wapo itakuwa na kazi ya kucheza mechi moja zaidi ili itinge fainali na baada ya hapo ni ‘mipango’ ya ubingwa.

Kinachovutia zaidi ni suala la mashabiki wengi wa Simba ambao wamekuwa wakizishangilia kila timu zinazokutana na Yanga hasa katika michuano ya Kagame.

Mashabiki wengi wa Simba hujitokeza kwa wingi kuizomea Yanga na kumshangilia mpinzani wake.

Lakini safari hii, Yanga inakutana na Azam FC. Si kwamba ni timu ya Tanzania ndiyo maana Simba wataishangilia au watahofia kuizomea, lakini hata Azam FC nao wanaonekana kuwa ‘wasaliti’ kwa Simba.

Hali hiyo inatokana na ule uamuzi wa mechi ya mwisho ya msimu, wakati Yanga tayari ni mabingwa na Simba na Azam FC wakiwania nafasi ya pili.

Azam FC alikuwa na asilimia 75 ya kupata nafasi hiyo huku Simba wakibaki na 25 lakini hawakukata tamaa.

Mechi iliyokuwa inatakiwa kuamua ni kati ya Yanga dhidi ya Azam FC. Kama Azam ingefungwa na Yanga, basi ingeibua matumaini ya Simba na ile asilimia 25 ingepanda.

Lakini Yanga ikalala, Simba wakaona kuwa kulikuwa na ‘mipangp’. Tena wakaalani kulikuwa na mvua kubwa lakini bado mechi iliendelea kuchezwa kwa kuwa Azam FC walikuwa wanaongoza na mwisho walishinda.

Kilichowaudhi zaidi, Simba ambao angalau walionekana na ‘undugu’ na Azam FC kuliko Yanga, ni kuona Yanga na Azam kwa pamoja wakiwa wameungana na kushangilia mara tu baada ya mechi.

Mashabiki wenye njano na kijani, waliunga na wenye nyeupe na bluu na kuangusha bonge la ‘sherehe’ pale Taifa tena bila ya kujali mvua.

Sasa Simba wataishangilia Azam FC iiue Simba, au kwa mara ya kwanza wataweka rekodi kuizomea Yanga pamoja na timu wanayocheza nayo.

Je, ule urafiki wa Yanga na Azam utakuwepo tena Jumatano? Watashangilia pamoja tena au sana nao ni ‘maadui’?

Hii ni sehemu ya kuonyesha soka lilivyo na burudani na huenda, Jumatano kutakuwa na burudani ya kutosha ndani na jukwaani kwenye Uwanja wa Taifa.