HODI HODI TFF, CHONDE WEKENI ULINZI KWA WACHEZAJI LIGI KUU BARA

Na Saleh Ally

MECHI ya pili kwa kila timu inaonekana wazi Ligi Kuu Bara imeanza kupamba moto na hakika utamu wake unaanza kuonekana.

Kuna timu zimeshinda mechi zote mbili, hasa vigogo na wakongwe kama Yanga, Simba, Mtibwa Sugar na Azam FC, lakini kuna zile ambazo mambo yameenda vibaya na kupoteza mechi zote mbili.

Kupoteza zote mbili ni kutopata pointi hata moja, lakini wapo ambao angalau wameambulia kutoka sare moja au sare na ushindi. Ndiyo ligi imeanza na kila upande unaangalia suala la biashara asubuhi.

Kama timu itajichanga katika kipindi hiki na kufanya vizuri, ina nafasi ya kusonga na kujiweka katika nafasi nzuri ya ubingwa tena mapema.

Suala ya kuona ni mapema sana, mambo hayawezekani au lazima kusubiri hadi baadaye ndiyo kupotea huko, maana wapo wanaozichanga pointi kipindi hiki, tena taratibu tu.

Wakati ligi inaanza kupamba moto, ya kuzungumzia hayakosekani. Leo nalenga suala la ulinzi kwa wachezaji uwanjani na hasa ukiangalia katika mechi chache tu za Ligi Kuu Bara.

Inaonekana kuna baadhi ya wachezaji hawana malengo au wana malengo na wanaposhindwa kuyatimiza, huenda wanataka kuharibu malengo ya wengine.

Rafu, ubabe wa kijinga, kucheza kwa kulenga kuumiza, hakika haiwezi kuwa ni lengo la kufanikisha mambo kimichezo. Kuumiza mwili si jambo sahihi hata kidogo.

Ulimuona Kocha Hans van der Pluijm wa Yanga akimlalamikia mwamuzi kuhusiana na wachezaji wa Prisons ya Mbeya, kwamba hawakuwa na mchezo wa kiungwana na walilenga kabisa kuwaumiza wachezaji wake.

Kocha wa Simba, Dylan Kerr alionyesha kuchukizwa na mchezo wa wachezaji wa Mgambo, si kwamba walikuwa ni fiti sana, lakini faulo hazikuwa za kimichezo.

Najua walengwa wakisoma hapa, watalalama kwamba kwa kuwa Simba au Yanga wamefanyiwa ndiyo imesemwa. Ukweli ni hivi, awe mchezaji wa timu yoyote anapaswa kujua soka la kiungwana ndiyo bora na lenye mafanikio.

Kuumia kuna bahati mbaya, lakini si sahihi kumuumiza mchezaji mwingine kwa makusudi, kwani hata uliyefanya kosa utabaki na kitu moyoni ambacho kitakutafuna kwa ndani, hasa kama ni mstaarabu na unajali.

Tena kila mchezaji anapaswa kujua, kama yeye kwake soka ni kazi, pia kwa mwingine ni kazi. Kwamba kama mwingine anaumia na atakosa mengi na familia yake itaathirika, basi ajaribu kujifikiria ikitokea kwake itakuwaje.

Uungwana ni kuangalia soka si vita, si sehemu ya kuumizana, si sehemu ya kukwamishana, si sehemu ya kuzuia ndoto za wengine. Hivyo ni jambo jema kuangalia soka la kiungwana.

Kama wachezaji wanaingia uwanjani wakiwa wamepania kuwazuia wachezaji nyota au kutoka timu maarufu, basi washindane nao kwa maana ya ushindani wa kisoka.

Beki Luke Shaw wa Manchester United amevunjika mguu katika mechi ya Ligi ya Mabingwa Ulaya walipokuwa wakipambana dhidi ya PSV ya Uholanzi. Wakati anaumia, faulo ilionekana ni ya kimpira, hadi sasa hakuna kulaumu na inaonekana ilikuwa bahati mbaya.

Jiulize aliyemuumiza angekuwa amefanya makusudi, sasa angekuwa anajisikiaje? Ndiyo maana ninasisitiza lazima kuwe na uungwana kwani soka ni mchezo unaohusisha wanadamu ambao wameumbwa na uungwana ndani yake.

Kuumiza hakuwezi kuwa sehemu ya mafanikio, kucheza kwa kutaka kukwamisha wengine hakuwezi kuwa chachu ya mafanikio tena hata kidogo.

Ndiyo maana nasisitiza kwa wachezaji kubadilika, lakini naisisitiza TFF kulisisitiza hili kwa waamuzi kwamba lazima kuwe na ulinzi kwa wale wanaotaka kuumiza kwa makusudi, wapewe adhabu kali.

Wakati mwingine, binadamu asiyejielewa, ni rahisi sana kubadilika na kufanya mambo vizuri kama akikumbana na dhabu. Hivyo, hili lipewe kipaumbele ili tushuhudie soka likipambana kukua na si kukuza Kung Fu au mieleka ndani ya soka.