JERRY MURO HAKUWEPO WAKATI UZALENDO KWA TAIFA STARS UKIJENGWA UPYA...

Na Saleh Ally

Umemsikia Msemaji wa Yanga, Jerry Muro akizungumzia maandalizi ya kikosi cha Yanga kwa ajili ya msimu mpya?

Kama haukumsikia, mimi nilisikia akihojiwa na moja ya redio moja katika kipindi chake cha michezo. Muro alikuwa akielezea namna Yanga ilivyo fiti.

Alikuwa akisisitiza kwamba Yanga iko tayari kwa ajili ya mchezo wa Coastal Union ambao utakuwa ni wa kufungua Ligi Kuu Bara kwao na kampeni yao mpya kwa ajili ya kuanza kuutetea ubingwa wao.

Muro alijigamba, nafikiri ni jambo zuri. Muro alitoa tambo akiwadhihaki Simba kwamba si wa kimataifa, ambalo si jambo baya kwa kuwa hao ni watani.

Lakini Muro, alichemsha baada ya kuingiza tambo zake katika kikosi cha timu ya taifa, Taifa Stars, jambo ambalo lilinivuta kuandika makala haya.

Wakati akijigamba, Muro alisema Yanga ni ya kimataifa na kulidhibitisha hilo ni ule ukuta wa Taifa Stars ambao kwa asilimia 90 uliundwa na wachezaji kutoka Yanga.

Aliwataja kipa Ally Mustapha ‘Barthez’, beki wa kushoto Haji Mwinyi, beki nne Kelvin Yondani na kitasa Nadir Haroub ‘Cannavaro’, wote wametokea Yanga.

Muro alisema wachezaji wote hao, wanatokea Yanga na ndiyo maana Wanigeria walishindwa kufunga bao hata moja na hiyo inaonyesha kiasi gani Yanga ni ya kimataifa.

Tambo kwa Yanga na Simba, sawa kabisa kama ambavyo nimeanza kueleza. Lakini Muro amesahau Watanzania wanaipigania kwa pamoja Taifa Stars kuhakikisha wanaiunga mkono kweli?

Amesahau kwamba Watanzania kwa asilimia kubwa wameanza kurejesha umoja, wameanza kuungana na leongo ni kuifanya Taifa Stars bora na moja kwa ajili ya Watanzania.

Sijui kama Muro anakumbuka kwamba kati ya vitu vilivyoua uzalendo katika kikosi cha Stars ni watu kuendekeza Usimba na Uyanga.

Amesahau kwamba Usimba na Uyanga ndiyo ulichangania mapenzi ya Stars kugawanyika. Ikawa hivi, kipindi kikosi hicho kikiwa na Simba wengi, kinashangiliwa sana na Wanamsimbazi na kubezwa na Wanajangwani na kikiwa na wachezaji wengi wa Yanga, basi Simba hawakitaki huku yanga wakikiunga mkono kwa nguvu sana.

Sasa hayo yameanza kufutika, wachezaji wengi wa kikosi hicho wanatokea Yanga na Azam FC. Simba hawana wachezaji wengi lakini Wanasimba wanakiunga mkono kwa nguvu.

Huenda wako ambao hawafurahii, lakini lazima tukubali Taifa Stars haiwezi kuwa timu ya ‘kubalansi’. Vema kuangalia uwezo wa wachezaji na kujali kikosi ‘kitapafom’ vipi na kuleta matokeo mazuri.

Sasa wakati wengine wanaona umuhimu wa utaifa, kiongozi ambaye amepewa dhamana ya kuzungumza kwa ajili ya klabu kongwe kabisa, anamwaga maneno kama hayo ya kuysambaratisha umoja.

Muro, aisee Muro, inabidi ubadilike kwa kuongeza umakini katika kauli zako. Lazima ujue wakati husika wa kusema jambo fulani. Huenda uliangalia utani wenu zaidi na Simba, lakini haukujua kauli yako itageuka kuwa sumu kwa taifa.

Tukianza mgawanyino kwa sasa, maneno kama hayo, mwisho yataamsha hisia na watu watarudi hadi kuhoji, vipi Mkwasa ni kocha wa Yanga, mbona hakuna kocha wa Simba, au lazima na Matola aitwe.

Hivyo ni vizuri sana kuliangalia hilo au kuangalia nini cha kuzungumza kulingana na wakati mwafaka. Kwani hata kama ungesema Yanga ina safu bora ya ulinzi, ukawataja majina wachezaji bila ya ksuema walifanya nini wakiwa Taifa Stars, ingekusaidia kujenga hoja yako vizuri bila kusababisha mifarakano. Huenda ulipotea, sasa rudi kwenye reli na kazima ujitambue, pia utambue kwamba unapozungumza inakuwa ni kwa niaba ya Yanga na si niaba ya Muro.