SASA DAKIKA 450 KATIKA BENCHI, KILA MWEZI ANABEBA MILIONI SITA, BOSSOU NI MRADI WA MTU YANGA?

Na Saleh Ally

NIKISEMA beki Vincent Bossou, raia wa Togo, alisajiliwa Yanga kwa kuwa alionekana anamkaba mshambuliaji gwiji wa Ivory Coast, Didier Drogba, nani anaweza kunikatalia?

 Nikikuambia hivi, kwamba kama picha ya mchezaji akimkaba mchezaji maarufu duniani ingekuwa inatumika kwenye usajili, basi beki Nadir Haroub ‘Cannavaro’ na Kelvin Yondani sasa wangekuwa wanacheza Ligi Kuu England, unawezaje kunikatalia?

Maana Yondani na Cannavaro wakiichezea Taifa Stars, wana picha kibao wakipambana na washambuliaji kama Drogba, Salmon Kalou wa Ivory Coast, Kaka, Robinho, Ramires wa Brazil pia Samuel Eto’o na nyota wengine wa Cameroon.

Bossou ameonekana ni beki mwenye uwezo, beki ambaye ataisaidia Yanga tena katika michuano ya kimataifa kwa kuwa alionekana akipambana na Drogba wakati Togo ikipambana na Ivory Coast.

Lakini hadi sasa, Yanga imecheza mechi tano ambazo ni dakika 450 mchezaji huyo amekuwa akiendelea kubaki benchi bila ya kupata hata dakika moja ya kucheza.

Dakika 450 katika benchi kwa mchezaji wa kimataifa anayetarajiwa kuisaidia Yanga kimataifa akiwa ameshindwa kupata nafasi ya kuisaidia katika mechi za nyumbani, kweli inaingia akilini?

Analipwa mshahara wa dola 3,000 (zaidi ya Sh milioni 6), lakini bado yuko benchi na walio chini kimishahara au maslahi ndiyo wanaoitumikia Yanga. Je, Mtogo huyo ni mradi wa mtu ndani ya Yanga?

Najua wako ambao kamwe hawataki hili liguswe kwa kuwa wanaona kama wanaingiliwa, wanaona kama wanasakamwa. Swali, Bossou faida yake kwa Yanga ni ipi na vipi benchi la ufundi lilipitisha asajiliwe?

Bado kilio changu kilekile, klabu zimelialia kuongezewa wachezaji wa kigeni kutoka watano hadi kumi, TFF na Bodi ya Ligi Tanzania (TPLB) wakakubali kuongeza wachezaji hadi wafikie saba.

Maana yake katika ile idadi ya tano, wachezaji wa kigeni sasa wakaongezwa wawili na kufikia saba. Lakini Yanga imekuwa ikiwaacha wawili benchi katika mechi zote tano ambao ni Bossou na Andrey Coutinho, raia wa Brazil.

Kumsafirisha mchezaji kutoka Brazil, unamlipa mshahara wa dola 2,500 (zaidi ya Sh milioni 5 kwa mwezi), lakini anaendelea kukaa benchi na wanaoitumikia timu ni wale wanaolipwa chini yake, maana yake nini?

Huenda sielewi maana ya mchezaji wa kimataifa, tena napenda mnifundishe hasa kwa kuwa kama kweli anakaa nje mechi tano huku wazalendo ndiyo wakimuonyesha soka linachezwa vipi, hiki ni kichekesho cha karne!

Nauliza hivi, uongozi wa Yanga unaweza usisikie uchungu kwa kuwa fedha hizo si mali ya kiongozi yeyote wa utendaji au kama zinamilikiwa na uongozi basi atakuwa Mwenyekiti Yusuf Manji, hivyo hakuna anayeona uchungu.

Au benchi la ufundi linaloongozwa na kocha mkongwe, Hans van Der Pluijm limeamua kukubaliana na hilo, halafu linaona ni sawa kwa kuwa hakuna kati yao anayelipa mshahara au mwenye uchungu na fedha za Yanga?

Niulize, benchi la ufundi lilishawishiwa? Benchi la ufundi lililazimishwa? Kwamba lazima limsajili Bossou au kumbakiza Coutinho waendelee kubaki benchi?

Kama Yanga ilimuacha beki mzalendo Rajab Zahir na kumchukua Bossou, tofauti yake au faida yake ni nini hasa?

Hakika kuna mambo yanashangaza na kuchanganya sana ingawa inaonekana ni kawaida kwa wengine lakini sasa huu ndiyo wakati Yanga impe nafasi Bossou acheze, aache tu kushuhudia mechi za Yanga akiwa amekaa kwenye kiti huku akilipwa mamilioni.

Nasisitiza kama Coutinho na Bossou hawana uwezo hata wa kucheza kikosi cha kwanza kwa mechi tano, yaani dakika 450, Yanga lazima ifanye uamuzi mgumu na kama ni mradi wa mtu, sasa ndiyo wakati sahihi wa kuusambaratisha. Nitarudi.

FIN.