ULISIKIA MAMBO YA KISIGA AKIWA NA RUVU SHOOTING PALE MABATINI?

Timu ya Ruvu Shooting ya Pwani inayoshiriki Ligi Daraja la Kwanza, wikiendi iliyopita imetoka na kicheko katika mchezo wake dhidi ya Kurugenzi ya Iringa baada ya kuichapa mabao 2-0 katika mchezo uliopigwa kwenye Uwanja wa Mabatini, Pwani.

Ruvu iliyo katika Kundi B, ilijipatia mabao hayo kupitia kwa wachezaji wake, Shaban Kisiga na Yahaya Tumbo.

Msemaji wa timu hiyo, Masau Bwire, amejigamba kuwa huo ni mwanzo mzuri kwa timu yao baada ya kufanya vibaya katika michezo yao miwili iliyopita ambapo lengo lao ni kuhakikisha wanapigana kurudi ligi kuu.

Matokeo ya michezo Mingine, Polisi Tabora iliibuka na ushindi wa mabao 3-1 dhidi ya Mbao ya Mwanza, Ashanti United ya Dar ikaifunga CDA (Mji Mkuu) ya Dodoma mabao 2-1, Burkina Faso ikafungwa na Njombe Mji bao 1-0, Rhino Rangers ikabanwa mbavu na Geita Gold kwa kulazimishwa sare ya bao 1-1, JKT Oljoro ikashinda dhidi ya Polisi Mara kwa bao 1-0.