KABLA MAGUFULI HAJAGONGA HODI, TFF ACHENI USHIKAJI KATIKA MAMBO SIRIAZ

RAIS WA TFF, JAMAL MALINZI AKIWA NA RAIS WA CAF, ISSA HAYATOU (KATIKATI) PAMOJA NA RAIS MSTAAFU WA TFF, LEODEGER CHILLA TENGA.

Na Saleh Ally

SHIRIKISHO la  Soka Tanzania (TFF) ndiyo linalopewa nafasi kubwa kusimamia maendeleo ya soka nchini na lazima tukubali, ambayo yamekuwa yakipigiwa kelele, huenda sasa yameanza kujiendesha.

TFF imekuwa ikilalamikiwa katika suala la usimamizi wa mambo. Huenda wengi wakawa wamepata nafasi nyingi ya kupaza sauti kwa sauti ya juu baada ya timu yetu ya taifa, Taifa Stars kufungwa mabao 7-0 na Algeria.

Kipigo hicho, huenda kikawa mwanzo mpya ya wale ambao hawakuwa wamewahi kusikilizwa kwa kile ambacho kimekuwa kikizungumzwa na wadau wengi na huenda hakikupewa nafasi ya kusikilizwa au kufanyiwa kazi.

Hivi karibuni, tumeona Rais wa Tanzania, John Pombe Magufuli akifanya ziara za kushitukiza katika sehemu ambazo ni taasisi za serikali.

Amefanya hivyo baada ya kugundua kumekuwa na uzembe wa kupindukia. Kweli kila sehemu aliyokwenda mambo yameonekana kuwa magumu na mwisho mabadiliko yamefanyika.

Baada ya ziara hizo za Magufuli, sehemu nyingine ambazo ni ofisi za serikali, wameamka angalau hata kuanza kupanga mafaili yao vizuri kwa kuwa wanajua Magufuli anaweza ‘akaibuka’ wakati wowote na wenyewe wakaingia kwenye matatizo.

Hivyo wamerejea katika utendaji bora na kuanza kuwatumikia wananchi katika kiwango sahihi kinachotakiwa. Hii ni sehemu ya udhaifu mkubwa ya sisi Watanzania, kwamba ni watu tunaotaka kuchungwa kama wanyama ili kufanya mambo yetu katika usahihi au ubora unaotakiwa.

Moja ya matatizo makubwa ndani ya shirikisho hilo la soka nchini ni ushikaji au kupeana nafasi ndani yake kwa kupeana kwa kuwa fulani ni mshikaji na anakuwa hana mashiko au faida hata kidogo katika uendelezaji wa soka nchini.

TFF inaweza ikawa na watu wengi ndani, lakini si wale ambao wana uwezo kwa ajili ya kusukuma maendeleo kwa kuwa uwezo wao ni mdogo au hawana vigezo vya kukaa katika nafasi husika.

Mara kadhaa, nimekuwa nikipiga kelele kuhusiana na mshauri wa ufundi wa Rais wa TFF. Kwamba ni mtu ambaye hana vigezo na hawezi kuwa msaada kwa kuwa hana rekodi yoyote ya kufanya vizuri katika chochote naye amekuwa akijisifia uwezo mkubwa wa fitna jambo ambalo, kamwe si la ufundi.

Lakini bado TFF haina haja ya kumsubiri Magufuli atue pale ili ianze kufanya mabadiliko. Badala yake sasa ndiyo wakati mwafaka wa kufanya mambo bora na sahihi kipindi hiki.

Hakuna ujanja, huu ndiyo wakati wa Rais wa TFF, Jamal Malinzi kuanza upya kuangalia katika vitengo vyake kuwa watu aliowaweka katika vitengo vya ufundi, masoko, ushauri, uendelezaji vijana na mambo mengine kama ni sahihi.

Wanapaswa kuwa watu sahihi ambao watasaidia maendeleo ya mchezo wa soka nchini na wasiwe waliowekwa kwa kuwa tu wanaonyesha mapenzi makubwa kwa Malinzi.

Kuonyesha mapenzi makubwa kwa Malinzi bila ya kumkosoa ni uoga na unafiki au ninaweza kuuita kuficha uwezo mdogo na kama utaendelea kuendekezwa ndiyo utakaokuwa ukiendelea kutumaliza na TFF itabaki kama taasisi ya kuwafurahisha, kuwalipa fadhila na kuwatafutia watu riziki kwa njia ya mkato.

 Ofisa Masoko anafiti katika nafasi yake? Kazi ya Matandika ni sahihi, kweli anahitajika TFF, Baraka Kizuguto anafanya mambo yake kwa usahihi? Baada ya hapo, kuna haja ya kuangalia wasiofaa waondolewe wapewe nafasi walio sahihi, pia wapewe nafasi ya kutimiza majukumu yao kwa ufasaha.

Hakuna maendeleo yanayopatikana kwa utendaji kazi huku yakiwa yamezungushiwa kivuli cha ushikaji. TFF ni taasisi ya umma na hili wote waliopo pale TFF akiwemo Malinzi wanapaswa kulitambua.

Malinzi pia anapaswa kujua, washikaji wamewaangusha watu wengi sana hasa viongozi na wafanyabiashara wakubwa. Hivyo hapaswi kuhofia atakosa kura muhula unaofuata kama atakuwa amechapa kazi kwa uadilifu na mafanikio yakaonekana. Ushikaji isiwe nguzo ya baadaye wakati maendeleo hayapatikani.