SIKIA HII YA MKWASA, KWAMBA STARS ILIFUNGWA NA ALGERIA HATA KABLA YA MECHI

Kocha Mkuu wa Taifa Stars, Charles Mkwasa, amefunguka juu ya yaliyotokea nchini Algeria walipoenda kucheza mchezo wa marudiano wa kusaka nafasi ya kushiriki Kombe la Dunia dhidi ya timu ya taifa hilo.

Stars ilipata kichapo cha mabao 7-0 katika mchezo huo wa pili, hivyo kutolewa kwa jumla ya mabao 9-2. Akizungumza na Championi Ijumaa, Mkwasa alielezea yaliyowatokea kiasi cha kuonekana ni kama walipoteza mchezo hata kabla ya kuingia uwanjani.

Mkwasa anatiririka: “Kwanza tulipotua Algeria, walianza kufanya fitina palepale uwanja wa ndege, tulikuta wenyeji wametuandalia basi ambalo tulilikataa kwa kuwa kuna basi lingine tuliandaliwa na mtu tuliyemtuma.

“Ubishani wa suala hilo ulichukua muda mrefu, mwisho tukapanda lile ambalo tuliandaliwa na mtu wetu, tukachelewa kufika hotelini, siku hiyo ikaisha bila ya kufanya mazoezi.

“Katika mkutano wa kabla ya mechi (pre match meeting), walikuwa wakitumia Lugha ya Kiarabu na Kifaransa, tukaomba mtu wa kututafsiria wakagoma.

“Tulipoingia uwanjani wakati wa kupasha kabla ya mechi, upande wetu pekee ndiyo ukawa umemwagiwa maji huku ule mwingine ukiachwa, ndiyo maana wakati wa mchezo tukawa tunateleza, kwa kuwa wenzetu walikuwa na viatu maalum vyenye meno makali, wakawa hawatelezi.

“Wakati Wimbo wa Taifa wa Tanzania unaimbwa, mashabiki wa Algeria walikuwa wakizomea kitendo ambacho si cha kiungwana.

“Tukiwa mapumziko, upande wetu ukawa unamwagiwa maji kama awali ilivyokuwa. Tuliporudi uwanjani tulikuta upande wetu umemwagiwa maji kama ilivyokuwa awali, kwa kweli wachezaji wangu walipata shida sana na ukichanganya na kukataliwa kwa bao la Maguri (Elias), kila mmoja alikata tamaa.

“Wao wanapokuja huku sisi tunakuwa wakarimu kupitiliza wakati tukienda kwao wanatufanyia fitina mwanzo mwisho.”