SIMBA IMEANZA MAZOEZI MAPEMA, LAKINI PICHA HII INAONYESHA KUNA SHIDA

Na Saleh Ally

Simba ni kati ya timu zilizoanza mazoezi kujiandaa zaidi na Ligi Kuu Bara ambayo ilikuwa imesimama.

Kwa sasa imefikisha kama wiki moja ikifanya mazoezi chini ya Dylan Kerr anayesaidiana na Kocha Mkenya, Iddi Salim.

Pamoja na maandalizi ya mapema, Simba inaonekana ina kikosi cha vijana wengi ambao si wanaotumika katika Ligi Kuu Bara.

Mazoezi hayo ni mazuri lakini kimahesabu inaonekana walengwa hasa, hawako pamoja na timu.

Ingawa wachezaji wawili au watatu wako katika kikosi cha Taifa Stars na wengine wamechaguliwa Kili Stars, bado inaonyesha mazoezi ya Simba, hayatakuwa na faida kubwa kwa kikosi cha kwanza.

Huenda Kerr ameamua kuanza mapema akitaka kujipanga na kurekebisha kikosi. Lakini ukweli bado inaonekana malengo yake hayawezi kutimia.

Kama Simba itaendelea na mazoezi na kikosi hicho kwa wiki moja au zaidi. Hakika malengo ya kocha huyo na msaidizi wake, kamwe hayawezi kufikiwa.

Ukiangalia picha hiyo ina wachezaji wapatao 10, kati ya hao, makipa wawili ndiyo wenye nafasi ya kucheza kikosi cha kwanza pamoja na viungo washambuliaji wawili, Mussa Hassan Mgosi na Joseph Kimwaga ambao katika uhalisia si wenye uhakika wa namba katika kikosi cha kwanza.

Hesabu inaonyesha kati ya 10 unaowaona katika picha angalau wachezaji wawili tu wanaweza kuwa na uhakika wa namba katika kikosi cha kwanza. Utapima mwenyewe.

Jambo zuri ni kwa wachezaji wengi wa Simba kuhakikisha wanawahi mazoezi mara moja kila wanapotakiwa kufanya hivyo.

Kuwahi ni kumsaidia kocha kutekeleza anachotaka kufundisha kwa upanda badala kuendekeza 'ubishoo' wa kuonekana mjanja au staa ni yule anayechelewa kuripoti.

Pia wachezaji wanapaswa kuonyesha ukubwa wa nidhamu yao, kuachana na kufanya mambo kwa mazoezi, zamani ilionekana ni kitu cha kawaida. Lakini sasa vitu vimebadilika.