INTERVIEW YA SALEHJEMBE NA SAMATTA KUHUSIANA NA TIMU TATU ZINAZOMTAKA ULAYA, HII HAPA

Na Saleh Ally

Timu tatu za Ulaya zinamtaka mshambuliaji Mbwana Samatta wa TP Mazembe na zinatokea katika nchi mbili za Ufaransa na Ubelgiji.

Samatta amefanya mahojiano na Championi Jumatatu na kusema tayari timu hizo zimeweka ofa mezani, hivyo ni kazi kwake kuchagua aende wapi.

Lakini hata hivyo amefikia uamuzi mmoja, kwamba sasa hatasaini na klabu yoyote kuichezea timu tatu kati ya hizo hadi baada ya michuano ya Kombe la Dunia ngazi ya klabu itakapomalizika.

SALEHJEMBE: Kumekuwa na uhakika wa taarifa za kuondoka TP Mazembe, lakini hakuna uhakika unakwenda wapi!

Samatta: Kama ni kwa sasa, basi ninaweza kwenda kati ya nchi hizi, Ufaransa au Ubelgiji.

SALEHJEMBE: Ni kwa ajili ya majaribio?

Samatta: Majaribio niliishakataa ni kwenda kusaini. Hapa nilipofikia sidhani kama ninahitaji majaribio. Labda kama ni zile timu kubwa sana, hapo ningeweza kufanya.

SALEHJEMBE: Ni timu ngapi zimejitokeza kukupa ofa na unatarajia kusaini lini baada ya kuichagua ipi?

Samatta: Ofa tatu ziko mezani, kuchagua ipi ni suala la baadaye kwa kuwa nimeona nisisaini sasa.

SALEHJEMBE: Unataka kusaini lini na kwa nini?

Samatta: Tayari ofa ziko mezani, hivyo kuchagua ni rahisi tu, lakini nimeona nisisaini kwa sasa ili nifanye hivyo baada ya Kombe la Dunia kwa klabu.

SALEHJEMBE: Kombe la Dunia linazuia vipi usisaini wakati ofa iko mezani na uongozi wa TP Mazembe umekubali uende?

Samatta: Hauwezi kujua kitakachotokea katika michuano hiyo, kama ni neema ninaweza kupata klabu nyingine kubwa zaidi. Subira si jambo baya.

Awali kabla ya ofa hizi ilishatangazwa kuwa Samatta anaweza kujiunga na Lille ya Ufaransa baadaye mwezi Januari.