ZAHERA CHUKUA USHAURI HUU, WAKONGO YANGA SASA BASI

NA SALEH ALLY

YANGA wameongeza mchezaji mwingine raia wa DR Congo ambaye amejiunga na kikosi hicho akitokea nchini mwao.

Harakati za kukamilisha usajili wa Reuben Bomba ambaye imeelezwa anacheza kama kiungo wa pembeni kulia na kushoto lakini katikati kama namba kumi zilikuwa zinatarajia kukamilika kati ya jana na leo.

Tayari Bomba ameanza mazoezi na imeelezwa kwamba ni mmoja wa wachezaji ambao wameanza kuonyesha cheche zao mazoezini licha ya kwamba ni siku chache.

Jambo zuri, ubora wake utaonekana baada ya kuanza kucheza katika mechi za mashindano kwa kuwa mazoezi yanaweza kutoa dira ya mwelekeo wake kuwa ni mchezaji wa aina gani.

Ujio wa Bomba unaifanya Yanga kuwa na wachezaji wanne wa kigeni kutoka nchini DR Congo. Idadi inaweza kuwa tano kwa kuwa hata kocha mwenyewe ni raia wa DR Congo.

Kuna kiungo Papy Tshishimbi, kipa Claus Kindoki, mshambuliaji Herietier Makambo na sasa Bomba.

Nimeamua kueleza wazi na mapema kuhusiana na suala la idadi ya kuwa na wachezaji wa kigeni kwa wingi kutoka katika nchi moja. Hili limekuwa ni tatizo na kama unakumbuka niliwahi kulizungumza sana wakati huo Simba ina wachezaji sita kutoka nchini Uganda.

Wachezaji hao baadhi walikuwa wakiongozwa na akina Sserunkuma wawili, Juuko Murshid, Emmanuel Okwi, pamoja na Hamis Kiiza na mwisho wake Simba haikufanya vema zaidi ya kuambulia mzigo wa migogoro na wachezaji hao.

Suala la msingi kabisa huwa ni wachezaji wazuri lakini lazima kuangalia namna ya kuendesha timu itakuwaje. Suala la tahadhari ni bora zaidi katika uendeshaji kwa kuwa wachezaji wanaotokea nchi moja, wakiwa wengi wao hutengeneza himaya yao.

Kama utakuwa na wachezaji kuanzia wanne kutoka katika nchi moja, baada ya muda hawa hutengeneza himaya yao ndani ya himaya ya wenyeji na mwisho suala la kushindana nguvu kila upande ukitaka kuonyesha ukubwa wake huanza.

Mara nyingi hali kama hii inabadilika na kuwa tatizo katika afya ya kikosi hasa kama wale wachezaji wageni watafanikiwa kufanya vizuri zaidi maana watataka kuonekana ni bora zaidi kwa kuwa kunakuwa na suala la “mob psychology”.

Unajua inakuwa hivi; wakati kuna wachezaji watatu wanafanya vizuri kutoka DR Congo, huenda kama wako watano, wawili wanaweza kuwa wanaboronga. Hawa watataka kukombolewa kupitia mafanikio ya wengine na hapa njia rahisi ni kutengeneza uchonganishi kwa wengine. 

Utakuta wale wanaofanya vizuri wakawa wanatumika bila ya kujua. Mwisho ndani ya kikosi kimoja kunakuwa na makundi mawili yanayopigania ukubwa badala ya kuungana kuisaidia timu. 

Kawaida kwa kocha kama Zahera, kwake kiramani inakuwa rahisi kuchukua wachezaji nyumbani kwao. Kumbuka ni kocha wa timu ya taifa na suala la kujua wapi kuna mchezaji mzuri linakuwa ni jambo lisilo na ugumu hata kidogo. 

Tayari tumeona Kindoki amefeli, hili halina mjadala labda abadili mambo hapo mbele. Kama ni haki bin haki, lazima apunguzwe lakini lazima kuwe na mjadala ambao hauna sababu kwa kuwa kocha atajaribu kumlinda na wenzake watajaribu kutengeneza ushawishi ikiwemo kusema wanamjua ni mzuri na hajatulia.

Vema kuwe na wachezaji wa kingeni waliogawanyika kutoka katika nchi tofauti. Hapa nazungumzia ubora wa wachezaji wenyewe pamoja na afya ya endeshaji wa klabu kuhakikisha inakwenda bila ya migogoro au migongano isiyokuwa na ulazima au ile inayoepukika.

Hivyo, kama Zahera ataongeza mchezaji mwingine baada ya Bomba, awe anatokea DR Congo, itakuwa ni kuandaa mvurugano ambao unaweza kuiathiri Yanga. Mfano, Zahera akiondoka au kuondolewa (yote yanawezekana), watakaobaki pia hawatakuwa na furaha sana.

Pia inawezekana wakati ni wachezaji wazuri, Yanga inawahitaji lakini wakaondoka kiulauni au wakagoma kuongeza mkataba kwa kuwa wataitwa na lengo litakuwa ni kwenda aliko kocha. 

Vizuri sana kupunguza idadi ya wachezaji wa kigeni kutoka katika nchi moja. Yanga wanaweza wasilione hili sasa lakini baadaye likawa lina athari kubwa.

Niliwahi kuwaambia Simba kuhusiana na idadi kubwa ya Waganda katika kikosi chao, nilisisitiza haikuwa sahihi. Nilipokutana na kiongozi mmoja wakati ule, akaniambia ninatumika. Nilishangazwa sana.

Ajabu zaidi, baada ya idadi ya Waganda kuwa kubwa kuonekana ni tatizo kwao, siku moja tulipokutana, nilimuuliza shida ya Waganda ilikuwa ni nini. Kwa kuwa alikuwa amesahau, alinihadithia yale niliyokuwa nimeandika katika makala waliyoiponda na ajabu kabisa ambacho niligundua sisi wanadamu tumeumbwa na kusahau.

Ni pale aliponiambia yeye amekuwa na wazo la kupunguza idadi ya wachezaji wa kigeni kwa wingi kutoka katika nchi moja, lakini viongozi wenzake wamekuwa hawamuelewi na sasa inaonekana watakuwa wamemuelewa!