BIASHARA UNITED YAPANIA KUFUNGA BIASHARA YA STAND UNITED LEO

KOCHA Mkuu wa Biashara United, Amri Said ambaye alikuwa Mbao FC amesema kuwa amegundua kilichokuwa kinaisumbua timu yake hivyo leo atawapa taabu wapinzani wao Stand United kwa kufunga biashara jumlajumla.

Said amesema kikubwa ambacho kilikuwa kinaisumbua timu ya Biashara United hasa kwa wachezaji ilikuwa ni kukosa pumzi na mbinu za kumaliza mipira ambayo wanakuwa nayo Uwanjani.

"Wachezaji wana uwezo mkubwa na hilo niligundua baada ya kuwaona Uwanjani, kikubwa ambacho kilikuwa kinawaponza ni kutokuwa na pumzi pamoja na uwezo wa kumaliza nafasi ambazo wanazipata wakiwa Uwanjani.

"Kwa sasa kufungwa itakuwa ngumu kutokana na mbinu ambazo nimewapa wachezaji wangu, imani yangu ni kupata matokeo kwenye michezo yetu yote," alisema Said.

Leo Biashara atakuwa mzigoni akimenyana na Stand United Uwanja wa Karume, huu utakuwa ni mchezo wake wa tatu baada ya kuanza kupata matokeo mbele ya Coastal Union kwa kuichapa mabao 3-2 na kutoka suluhu na Singida United.