KAZI KUBWA KWA SASA IPO MIKONONI MWA WACHEZAJI WA TIMU YA TAIFA YA TANZANIA, PAMBANENI

TIMU yetu ya Taifa ya Tanzania ‘Taifa Stars’ inatarajia kucheza mchezo wake wa kimataifa ambao ni maalumu kwa kufunzu michuano ya Chan Agosti 28 dhidi ya Kenya.

Ni muda wa wachezaji wetu wa timu ya Taifa kuipeperusha vema Bendera ya Taifa kwa kupambana na kupata matokeo chanya.

Tukumbuke kuwa tunaanza kucheza nyumbani hivyo kipaumbele kikubwa iwe ni kupata matokeo chanya kwenye mchezo wa kwanza.

Ushindani ni jambo la lazima na Kenya ni jirani zetu tumekuwa na historia ya kupata ushindani mkubwa kwao sasa ni lazima huo mwiko tuuvunje.

Tusisahau kwamba walitufunga mabao 3-2 tulipocheza nao kwenye michuano ya Afcon nchini Misri sasa wanakuja kwetu tujipange.

Kila timu inatafuta nafasi nasi pia tunapaswa tuonyeshe kwamba tunaweza na hatubahatishi tukiwa nyumbani.

Kila la kheri timu yangu ya Taifa na wachezaji wote mnapaswa mjitume kwa hali na mali kupata matokeo chanya kwenye mchezo huo.

Tukiachana na Stars acha tuje huku kwenye Ligi Kuu Bara ambapo tunaona tayari maandalizi ya msimu ujao yameanza kupamba moto.

Baada ya ratiba kutoka ambapo inaonesha kwamba Agosti 23 Ligi Kuu Tanzania Bara inaanza kutimua vumbi ni muda mwafaka kwa kila timu kujipanga vema.

Maandalizi ya awali ni muhimu kwa kuwa ndiyo yanatengeneza picha ya timu kamili itakayopambana msimu ujao na kuleta mafanikio ambayo yanahitajika.

Mipango sahihi ni lazima kwa sasa ipangwe hasa kwa zile timu ambazo msimu ulipita zilikuwepo kwenye ligi na ziliona namna hali ilivyokuwa ya kusuasua hasa kwa upande wa fedha.

Pia ikumbukwe kwamba zipo ambazo ziliponea chupuchupu kushuka daraja ni jambo la kuzingatia kwa ajili ya msimu mpya ambao unatarajiwa kuanza.

Kama hakutakuwa na mipango makini tusitarajie ushindani mkubwa kutoka kwa zile timu ambazo hazijajiandaa ni muda mwafaka wa kufanya mambo makubwa hasa kwa kuanza maandalizi mapema.

Kila timu ipange mkakati wake mapema na kuwapa wachezaji ambao tayari wameshasajiliwa na timu zote kwa ajili ya matumizi ya msimu ujao.

Inasikitisha pia inaumiza kuona kwamba mpaka sasa kuna baadhi ya timu hazijafanya usajili wa aina yoyote zaidi zenyewe zinazidi kubomolewa kwa wachezaji wao kuchukuliwa na timu nyingine hii ni mbaya kwa sasa.

Nasema ni mbaya kwa kuwa ukweli ni kwamba dirisha la usajili linakaribia kufungwa na likifungwa hakutakuwa na muda mwingine wa kusajili sasa unafikiri wachezaji gani watakaoitumikia timu ilihali hakuna usajili?

Haina maana ama ulazima kwamba kwenye kila dirisha la usajili lazima timu isajili hapana inategemea na ripoti ya mwalimu lakini cha msingi ni kuangalia ni wachezaji wangapi wenye uzoefu ambao timu imewaacha wajiunge na timu nyingine? Je wale ambao wapo wataweza kuleta ushindani ?

Kama maswali haya yakipata majibu na uongozi wa timu ukakubali kwamba hakuna ulazima wa usajili na wanawaamini wachezaji waliobaki hakuna shida mambo acha yaendelee ila ninachoamini kwamba kwa vyovyote vile usajili ni kitu cha muhimu hasa kuelekea msimu mpya.

Timu nyingi zilikwama msimu uliopita kutokana na kufanya usajili usiokidhi vigezo wachezaji wengi walikuja kuonyesha kwamba hawawezi kuleta ushindani hivyo ni somo jingine kwamba usajili ni lazima uwe ule uliofanyiwa uchunguzi.

Timu nyingi zinafeli kwenye scout ya wachezaji jambo ambalo linawafanya waishie kutazama video kwenye mitadao kisha wanajidanganya kwamba mchezaji mzuri sio kweli.

Kwa zama ambazo tupo kwa sasa ni lazima klabu zote ziamke ziwe zinafuatilia michuano ya ndani zitapata vipaji vya kweli.

Wakati mwingine timu zinasajili wachezaji kutoka mataifa ya mbali ilihali hata ndani wapo wenye uwezo zaidi ya hao wanaosajiliwa tatizo ni kwamba hakuna ambaye anawafuatilia kwa ukaribu na kujua ni nani anayestahili kucheza ndani ya klabu kwa wakati huo.

Umakini katika kila jambo unahitajika ili kupata matokeo chanya msimu ujao, tunahitaji kuona ushindani unaongezeka na kwa timu zote.