TANZANITE LEO KAZI IWE MOJA TU, STARS NGOMA HAILALI KAZI INAENDELEA

  TUMEONA Timu ya Taifa ya Tanzania imewatoa kimasomaso mashabiki wake hasa kwa ushindi ambao wameupata kwenye michuano inayowahushisha wachezaji wa ndani maarufu kama Chan mbele ya Kenya.

Stars inahitaji pongezi licha ya kupata matokeo kwa njia ya penalti bado kwenye mchezo kitu cha mwisho kinachoangaliwa ni matokeo kwani wachezaji walionyesha nia ya dhati kupambana na kuamini lazima wapeperushe Bendera ya Taifa.

Timu ya Taifa ya wanawake chini ya miaka 20 ‘Tanzanite’ nao wamepata fursa ya kutinga hatua ya fainali kwenye michuano ya COSAFA inayoendelea nchini Afrika Kusini.

Kwa hatua ambayo wameifikia nao wanapaswa pongezi kwani kazi kubwa ya kupata matokeo tena ugenini inaleta picha mpya kwamba tayari imeanza kutambua thamani ya Bendera ya Taifa. 

Leo itacheza mchezo wake wa fainali dhidi ya Zambia hivyo wanapaswa wapambane kupata matokeo chanya.

Kabla sijaendelea na maada yangu pia nitumie muda huu kuwapa pongezi Yanga na Simba kwa kujitoa kwa ajili ya jamii, hakika mnastahili pongezi kwa matendo haya mema.

Mwanzo huu usiwe na mwisho bali uendelee kuishi kwa kila mmoja na uwe utamaduni wa kila shabiki na mwanamichezo.

Kujitoa kuna raha yake hasa unapowasiadia wengine ambao wapo kwenye uhitaji jambo jema ambalo kwa hatua na ukubwa wa timu zetu zinajenga picha nzuri kwa mashabiki na Taifa.

Pia kwa kupambana kwenye michuano ya kimataifa ambapo wote wamelazimisha sare walianza Simba kwa kulazimisha sare ya kutofungana huku Yanga nao wakilazimisha sare ya kufungana bao 1-1 dhidi ya Township Rollers uwanja wa Taifa.

 Turudi kwenye maada sasa ya leo, kazi kubwa ni kwa timu zetu za Taifa kuweka nguvu kwenye michezo yao ya mbele inayofuata.

Kwenye ulimwengu wa michezo kila kitu ambacho wachezaji wataamua kukifanya kwa nia moja siku zote hutimia na hata kuvunja rekodi ambazo awali zilikwekwa.

Kwa sasa kazi ni moja tu kwa timu zetu kufanya vizuri hivyo hilo lipo mikononi mwa kila mchezaji kuamua kutimiza nia ambayo wameiweka kwa dhati.

Kujiamini ni jambo la msingi kwani kama mchezaji atakuwa na hofu inakuwa ngumu kwakwe kufanya maamuzi sahihi yatakayoleta matokeo chanya kwenye mchezo ambao anacheza.

Tatizo hili likuwa linawakumbuka wachezaji wa Tanzanite ila mwisho wa siku lilipata dawa na hatimaye timu ikapata matokeo chanya kwenye mechi zake mbili za awali ni kitu kizuri na baadaye kutinga hatua ya fainali.

Kwa upande wa Stars wao walikuwa wanakumbwa na tatizo la kushindwa kumalizia nafasi ambazo wanazitengeneza ndani ya uwanja na bado limeendelea kuwatafuna.

Hilo limekuwa wazi kwani hata ushindi ambao wameupata ni kwa njia ya mikwaju ya penalti hivyo bado benchi la ufundi lina kazi ya msingi kulimaliza hili tatizo.

Kuna umuhimu wa wachezaji kujiamini na kumaliza mchezo mapema kabla ya kutegemea kupenya kwa penalti ambazo wakati mwingine hazina mwenyewe kama ambavyo jirani zetu Kenya imewatokea.

Kufuata maelekezo ya mwalimu ni kitu cha msingi kwa wachezaji wote wakiwa uwanjani kwani ule ndio mpango kazi wa kwanza ambao unatakiwa utekelezwe, kisha kama mbinu itafeli ndipo akili ya ziada kwa wachezaji inapaswa itumike.

Shirikisho la Soka Tanzania (TFF) linapaswa liwe na mikakati mipana kwa ajili ya kuendeleza vipaji na kukuza soka letu hasa kwa wachezaji wa ndani pamoja na wale wa nje.

Muda ambao tupo kwa sasa ni muhimu kutengeneza wachezaji ambao kesho watakuwa na misingi imara na watakuwa wamelelewa kwa muda mrefu kabla ya kuanza kuhangaika kutafuta wachezaji.