KOCHA SIMBA AIPA MAUFUNDI YANGA NAMNA YA KUIMALIZA ZESCO TAIFA

JAMHURI Kiwelu ‘Julio’ aliyekuwa Kocha wa zamani wa Simba na Dodoma FC amesema kuwa ili Yanga iwamalize wapinzani wao Zesco mapema inapaswa ibadili mfumo wake wa sasa wa kuchezesha washambuliaji wengi.

Yanga, Septemba 14 itakuwa kazini uwanja wa Taifa ikimenyana na Zesco FC uwanja wa Taifa ikiwa ni mchezo wa hatua ya kwanza wa Ligi ya Mabingwa Afrika.

Akizungumza na Saleh Jembe, Julio amesema kuwa Yanga ina kazi kubwa ya kufanya mbele ya Zesco kutokana na mchezo wao wa kwanza kuwa nyumbani kabla ya kwenda kurudiana na wapinzani wao ugenini.

“Mtego wa kwanza ambao upo mikononi mwao ni kwamba wanaanzia nyumbani, wakibugi nyumbani wataongeza presha kubwa ugenini na kuangukia pua sasa wanachotakiwa kufanya ni kubadili mfumo ambao wanautumia kwa sasa.

“Ukiwatazama Yanga wamekuwa na wachezaji wengi wa kigeni ambao wanaunda safu ya ushambuliaji na wote wamekuwa wakipangwa mbele kufanya ushambuliaji jambo linalowapa ugumu kupata matokeo, kazi ni ndogo tu Kocha Mkuu apunguze idadi ya washambuliaji mbele aweke viungo wengi hapo kitaeleweka,” amesema Julio.