VITA YA SINGIDA UNITED NA SIMBA LEO NI MOTO WA KUOTEA MBALI, CHEKI MAMBO YALIVYO

IKIWA chini ya Felix Minziro, Singida United ilipanda daraja msimu wa mwaka 2017/18 mabadiliko yakafanyika mikoba ya Minziro akapewa Mholanzi, Hans Pluijm ambaye aliwasha moto mwanzo mwisho.

Singida United kwenye mechi 30  sawa dakika 2,700 ilishinda mechi 11, sare mechi 11 na kuambulia kichapo mechi 8.

Ilimaliza ikiwa nafasi ya tano baada ya kujikusanyia pointi 44 ila katika dakika 720 za kichapo ilitumia dakika 180 sawa na mechi mbili kupoteza mbele ya Simba ilifungwa nje ndani.

Msimu wa 2018/19 mambo yalizidi kupamba moto ambapo timu ziliongezwa na bodi ya ligi zikawa 38 ilifungwa nje ndani na Simba.

Ilimaliza ligi nafasi ya 13 kibindoni na pointi 46 ndani ya dakika 1,260 za kupoteza ilitumia dakika 180 sawa na mechi mbili kufungwa na Simba nje ndani hivyo leo kazi itakuwa ngumu kwa timu zote kuhaha kuweka rekodi zao mpya.

Uwanja wa Amri Abeid Arusha moto utawaka na wajanja wa mjini wanasema ugali moto na mboga ni moto kwa  Singida United kutokana na haya hapa:-

Nafasi ndani ya ligi

Singida United iliyo chini ya Ramadhan Nswanzurimo ambaye amepewa kandarasi ya mwaka mmoja kwa sasa inahaha kurejea kwenye ubora wake kutokana na kutokuwa na matokeo chanya ndani ya ligi.

Kwenye mechi 7 sawa na dakika 630 ambazo imecheza msimu huu haitambui ladha ya ushindi zaidi ya kuambulia sare tatu na imepoteza mechi nne ipo nafasi ya 20.

Simba presha yake kubwa ni kuendelea wimbi la ushindi kwenye mchezo wake wa sita baada ya kuvuna jumla ya pointi 15 ikiwa nafasi ya kwanza kwenye mechi tano ambazo wamecheza.

Vita ya kiatu cha ufungaji

Kwa Singida United mambo bado mambo hayajawa sawa  kwenye mechi 7 mpaka sasa wamefunga mabao mawili la kwanza lilifungwa na Frank Zakari kwenye sare ya bao 1-1 na Ndanda FC huku la pili likifungwa na Stephen Opoku kwenye mchezo dhidi ya Polisi Tanzania ilipoteza kwa kufungwa mabao 2-1.

Simba wamecheza mechi tano kasi ya mfungaji bora wa msimu uliopita Meddie Kagere aliyefunga mabao 23 imepamba moto akiwa ametupia mabao 7, Miraj Athuman matatu na Mohamed Hussein bao moja na kufanya wafunge jumla ya mabao 11 jambo linaloongeza ugumu wa mechi.

Rekodi ya kutofungwa na kufungwa

Hesabu za Singida United ni kuvunja uteja mbele ya Simba kwa kufungwa nje ndani kwa misimu miwili mfululizo baada ya kupanda daraja mwaka 2017/18, huku Simba wao wakiwaza kuendeleza rekodi yao.

Mchezo wa kwanza uliochezwa uwanja wa Uhuru Singida United ilikubali kichapo cha mabao 4-0 na ule wa raundi ya pili ikafungwa bao 1-0 uwanja wa Namfua. Msimu wa 2018/19 ilifungwa mabao 3-0 uwanja wa Taifa na ilipoteza kwa kufungwa mabao 2-0 uwanja wa Namfua hivyo leo kazi ni kupindua meza.

Kasi ya ubingwa kuongezwa na kupunguzwa

Singida United inautazama mchezo wa leo kuwa gia ya kuipunguzia kasi Simba kutetea ubingwa wake kwani mpaka sasa kwenye mechi tano sawa na dakika 450 haijaambulia kichapo jambo linaloongeza ugumu kwa timu zote leo uwanja wa Amri Abeid, Arusha.

Vita ya mbinu za Mrundi na Mbelgiji

Kwenye benchi la ufundi la Singida United atasimama Ramadhan Nswanzurimo ambaye anautambua upepo wa ligi ya Bongo kwani aliwahi kuifundisha Mbeya City msimu wa 2018/19 alikutana na Mbelgiji uwanja wa Taifa na alipoteza kwa kufungwa mabao 2-0 hivyo wote wanatambuana mbinu zao kazi itaonyeshwa leo.

Maneno ya makocha haya hapa

Ramadhan Nswanzurimo, wa Singida United alisema kuwa anatambua mchezo utakuwa mgumu ila anaamini watashinda kutokana na morali ya wachezaji.

“Kila mchezaji anatambua hali ilivyo kwenye kikosi, hatujapata ushindi itakuwa vizuri tukishinda mchezo wetu wa kwanza kuongeza hali ya kujiamini,”.

Patrick Aussems alisema kuwa:” Haijalishi tunacheza na timu gani, kila mwalimu hesabu zake ni pointi tatu hayo ndio malengo ya timu pamoja na benchi la ufundi, tunatambua utakuwa mchezo mgumu tutapambana,”. 

Simba itawakosa manahidha wake wote wawili ambao ni John Bocco na Mohamed Hussein wanaosumbuliwa na majeruhi.