HESABU ZA SIMBA ZIPATIWE MAJIBU NDANI YA YANGA PIA KUTIMIZA ULE UKONGWE WA MAJINA YAO

SAA, dakika, sekunde zilikuwa zinakatika taratibu huku kila mmoja akihoji ni nini ambacho kinapikwa ndani ya Simba na hakuna aliyekuwa anajua.

Ikawa wiki, mwezi, miezi na hatimaye miaka ikakatika bila wale ambao walikuwa wanapiga porojo kuhusu kukamilisha ndoto za uwanja kutimia zaidi ya kuwahadaa wapiga kura.

Tumeona ilikuwa ni wimbo wa muda mrefu kwa kuwa Simba ni miongoni mwa timu kubwa ambazo zinafanya vema na kuleta ushindani kwa ukanda wa Afrika Mashariki inaweza ikasonga mpaka na Kati kwa kuwa ina makombe kadhaa ya Cecafa.

Kila mmoja mpenda maendeleo alikuwa anajiuliza kuna nini ambacho kinatokea ndani ya timu hiyo ambayo ina wanachama lukuki na wanapenda maendelo ila hakukuwa na majibu sahihi kwa wakati huo na kila aliyekuwa anapita alikuwa na stori zake maisha yakaendelea.

 Hata ilipobadilisha mfumo bado kulikuwa na sarakasi za hapa na pale juu ya muda kamili wa kukamilika uwanja baada ya timu kuwa mikononi mwa bodi ya wakurugenzi pamoja na wanachama wa Simba,

Hii ilikuja baada ya kubadili mfumo na kuweka kuwa kwa mfumo wa hisa uwekezaji wa kisasa ambao umebarikiwa na Serikali.

Pale Bunju nje kidogo wanaita ya  jiji la Dar ndio sehemu yao ambayo wameamua kujenga uwanja wa kisasa na umepewa jina la Mo Arena Complex.

Katika hili Simba mnapaswa pongezi kwa kuwa mmefungua njia ambayo ilikuwa imefungwa kwa muda mrefu na hakukuwa na mwingine wa kuifungua zaidi yenu wenyewe kuamua kuifungua.

80 ni namba ya kawaida ila unapokuja kuiweka kwa upande wa miaka ni mingi na si ya kitoto kwani kama kungekuwa na mfumo bora ilitakiwa ujengwe uwanja mkubwa zaidi ya ule wa Mo Arena.

Nakumbuka kuna siku nilikuwa uwanjani natazama mechi ya Simba wakati ule wa Patrick Aussems kwenye michuano ya kimataifa walikuwa wanacheza na AS Vita.

Mashabiki wa AS Vita walipoona uwanja wa taifa umejaa na rangi ni nyekundu na nyeupe walihofia na kuuliza hivi hawa ni mashabiki wa Simba na wameamua kuukomoa uwanja wao kwa kuujaza namna hii?

Imani yao walitambua kwamba kwa kuwa wapo ugenini na Simba ni jina kubwa basi hata uwanja ule wa taifa waliamini ni wa Simba mpaka walipokuja kutambua kwamba ni uwanja wa taifa walishangaa kwa namna mashabiki walivyojitokeza kwa wingi.

Hii inamaanisha kwamba Simba ina mtaji mkubwa wa watu ambao wanawazunguka wakiwatumia vema basi watafikia mafanikio wanayoyafikiria

Kumiliki uwanja pekee kwa ajili ya mazoezi haitoshi wanapaswa wawe na uwanja wao pia kwa ajili ya mechi kubwa kama ilivyo Azam wao wapo hatua ya mbele kabisa. Kila kitu kinawezekana kama hili la uwanja limepenya basi hata hili la kuwa na uwanja wa maalumu kwa ajili ya mechi linawezekana.

Pia hata Yanga nao wana kazi ya kufanya kufikia malengo yao kwa kuwa tumeona tayari wameanza mchakato kwenye uwanja wao wa Kigamboni kilichobaki ni kumaliza kwa wakati ili mambo yaende sawa na ukubwa wa klabu hizi kongwe.