KWA MWENDO HUU NDANI YA LIGI TUTAONA MENGI KWELI

LIGI Daraja la Kwanza (FDL) na Ligi Daraja la Pili (SDL) misimu yake kwa mwaka huu inaelekea ukingoni.

 Ukitazama SDL zimebaki raundi mbili kumaliza msimu, wakati FDL raundi tano zimebaki msimu kumalizika.

Kuna baadhi ya timu tayari zimejiweka karibu sana na kupanda daraja, hapa nazungumzia FDL ambapo Kundi B, Gwambina FC inaongoza, katika mechi tano inahitaji pointi sita tu kupanda moja kwa moja.

Huko chini vita bado ipo, timu zinapambana kuepuka janga la kushuka daraja. Tusubiri hadi mwisho itakuwaje.

Wakati FDL na SDL mambo yakiwa hivyo, Ligi Kuu Bara nayo inazidi kushika kasi. Tumeona juzi Yanga iliyotoka kuifunga Simba bao 1-0, nayo imekuja kukubali kichapo kama hicho kutoka kwa KMC.

Ukiangalia matokeo hayo ni kama ya kushtua kwani haikutarajiwa KMC ambayo ilikuwa nafasi ya 18 kabla ya mchezo huo, itakuja kuibuka na ushindi mbele ya Yanga inayopambana kuikimbiza Simba kileleni.

Lakini kwa wanaofahamu vizuri soka, wanatambua kwamba kuna matokeo ya aina tatu. Kushinda, kufungwa na sare.

KMC inapambana kujinasua kutoshuka daraja, hivyo ilikuwa na namna ya kufanya ili kushinda mchezo huu ikiwemo na michezo mingine ili tu isikumbane na janga hilo.

Kwa wakati huu ambao msimu wa ligi hiyo upo mzunguko wa pili kuelekea kuumaliza, tunaweza kushuhudia mengi kwa timu mbalimbali.

Hakuna timu ambayo inataka kushuka daraja, hivyo kila moja inapambana kuona inajinasua na hayo matatizo.

Timu zinafahamu kwamba kushuka daraja ni hatari kwani kuja kurudi inaweza kukuchukua muda mrefu sana.

Itazame Toto Africans, tangu iliposhuka daraja msimu wa 2016/17, hadi leo haijapanda na inazidi kushuka tu.

 Hivi sasa ipo Ligi Daraja la Pili na huko kuna hatari ikaenda na maji tena.

African Sports ya Tanga nayo ipo Ligi Daraja la Pili. Kama utakuwa unakumbuka nayo ilikuwa ligi kuu na katika msimu wa 2015/16, zilishuka timu zote tatu kutoka Tanga. Coastal Union, Mgambo Shooting na African Sports.

Katika timu hizo, Coastal Union pekee ndiyo imeweza kuirudi Ligi Kuu Bara, zilizobaki zipo madaraja ya chini zikiendelea kupambana.

Hata ukiiangalia Stand United ambayo msimu uliopita ilishuka daraja, inapambana pia huko FDL ambapo inaonekana inaweza kushuka tena. 

Hivyo kwa mifano hiyo, ndiyo maana tunaona hivi sasa timu zikipambana kweli, hazitaki kushuka daraja.

Wito wangu kwa wahusika kwa maana ya wanaosimamia ligi, kuisimamia kwa ukaribu hasa dakika hizi za mwisho kwani kuna malalamiko kwa baadhi ya timu kwamba kuna timu zinapendelewa.

Niliwasikia Ihefu wakilalamika kwamba mechi zao na zile za Dodoma Jiji FC zimekuwa zikichezwa siku tofauti wakiomba zichezwe siku moja ili kukwepa upangaji matokeo.

Timu hizo ambazo zipo kileleni mwa msimamo wa Kundi A katika FDL. Hivyo wadau wanataka kuona kinara akipatikana si kwa kuandaliwa.

Cha kupendeza zaidi ni kwamba mechi zao za wikiendi hii zinachezwa siku moja. Leo Jumamosi Dodoma Jiji inacheza na Njombe Mji, wakati Ihefu ikipambana na Boma. Nadhani hapa hakutakuwa na vilio tena.