MAKOCHA BONGO WAWAOMBEA WAGONJWA WA CORONA NA DUA ZAO USITUE PIA BONGO

KUFUATIA mlipuko wa ugonjwa wa Corona unaoendelea kutokea kwa sasa duniani, makocha wa timu za Bongo zinazoshiriki Ligi Kuu Bara wameomba ugonjwa huo usitue nchini na kuwaombea wagonjwa wapone mapema ili kurejea kwenye ubora wao.

Virusi hivyo ambavyo vilianza kuenea kwa kasi mwezi Januari vimekuwa ni hatari duniani ambapo kwenye sekta ya michezo kumesababisha ligi kubwa kusimamishwa ikiwa ni pamoja na Serie A, huku ile ya England nayo ikisimaishwa kwa muda kutokana na baadhi ya wachezaji na makocha kukutwa na ugonjwa huo.

Miongoni mwa Kocha ambaye amekuwa wa kwanza kungudulika na ugonjwa huo nchini Uingereza ni Mikel Arteta, Kocha Mkuu wa Arsenal ambaye alikuwa anajiandaa kuingoza timu yake kwenye mchezo wa Ligi Kuu England dhidi ya Brighton ambao nao umeahirishwa.

Wakizungumza kwa nyakati tofauti makocha hao ambapo Kocha Mkuu wa Tanzania Prisons, Adolf Rishard amesema kuwa amekuwa akifuatilia mwenendo wa habari zinazohusu Corona jambo ambalo linashtua dunia nzima licha ya kwamba haujafika Bongo kuna umuhimu wa kuomba lisifike na wagonjwa wapone.

“Kwa sasa imekuwa ni tishio la dunia nzima kwani wahanga ni binadamu wenzentu na kwenye familia za michezo tunaona namna hali ilivyo, maombi yetu ni kuona kwamba ugonjwa huu hautui Bongo na kwa wale ambao wanaumwa tunawaombea wapone ili maisha yaendelee,” amesema.

Hitimana Thiery, Kocha Mkuu wa Namungo FC amesema kuwa ni aina ya ugonjwa ambao una kasi kwenye kupunguza nguvu kazi licha ya kwamba haujafika Tanzania kuna umuhimu wa kuomba na kuzingatia kanuni za afya ili kujikinga na virusi hivyo.