MAPROO SIMBA WAWAKIMBIZA JUMLAJUMLA YANGA NDANI YA LIGI KUU BARA

NYOTA wa kigeni ndani ya kikosi cha Simba wameonekana na balaa kwenye kucheka na nyavu huku wakiyapoteza jumla mabao yaliyofungwa na wapinzani wao Yanga.

Simba ikiwa ipo nafasi ya kwanza kwenye msimamo baada ya kucheza mechi 28 imefunga mabao 63 ambapo wazawa wamefunga mabao 22 na wageni wamefunga mabao 41 wakiipoteza ile safu ya Yanga ambayo kwenye mechi 26 imefunga mabao 30.

Kinara wa kutupia mabao kwa wageni ambaye pia anakimbiza kwenye ligi ni Meddie Kagere raia wa Rwanda mwenye mabao 19 akifuatiwa na Deo Kanda raia wa Congo mwenye mabao 7, Francis Kahata raia wa Kenya ametupia mabao manne huku Luis Migussone raia wa Msumbuji, Gerson Fraga raia wa Brazil  wakitupia mabao matatumatatu kila mmoja.

 Sharaf Shiboub raia wa Sudan na Clatous Chama raia wa Zambia wakitupia mabao mawilimawili, Tairone Santos raia wa Brazil  ametupia bao moja.

Kwa upande wa wazawa Miraj Athuman ‘Sheva’ na Hassan Dilunga wanaongoza jahazi kwa kutupia mabao sita kila mmoja wakifuatiwa na nahodha John Bocco mwenye mabao manne, Jonas Mkude na Mohamed Hussein ‘Tshabalala’ wametupia mabao mawilimawili huku Ibrahim Ajibu na Erasto Nyoni wakitupia bao mojamoja.