MANCHESTER UNITED WASHIDWE WENYEWE KWA TIMO, CORONA YATIBUA MIPANGO YA LIVERPOOL

MANCHESTER United iliyo chini ya Kocha Mkuu, Ole Gunnar Solskjaer ina nafasi kubwa ya kupata saini ya mshambuliaji wa Klabu ya RB Leipzig, Timo Werner mwenye miaka 24.

Hatua hiyo inatokana na taarifa kueleza kuwa mshindani wake mkubwa Liverpool ya Kocha Mkuu, Jurgen Klopp imetupilia mbali mpango wa kufanya usajili kutokana na kuyumba kiuchumi kulikosababishwa na janga la Virusi vya Corona.

Ripoti zinaeleza kuwa Liverpool imeanza kubana matumizi ili kuweza kujipanga vema kwa ajili ya msimu ujao huku wakiamini kwamba kwa msimu huu itakuwa ngumu kwao kugharamia uhamisho wa mchezaji.

Inaelezwa kuwa miongoni mwa mbinu ambazo zitatumika kufanya usajili ni kuwachukua wachezaji ambao mikataba yao imemalizika ili kupunguza gharama za kuvunja mkataba na timu.

Timo ndani ya RB Leipzig inayoshiriki Bundesliga amecheza jumla ya mechi 118 na kutupia mabao 72 baada ya kujiunga na klabu hiyo 2016 akitokea Klabu ya VfB Stuttgart.